ТОШКЕНТ, 5 декабрь. /“Дунё” АА/. Ўзбекистон ташқи ишлар вазири Бахтиёр Саидов кеча Вена шаҳрида Германия ташқи ишлар вазири Йоҳанн Вадефуль билан музокаралар ўтказди, деб хабар бермоқда “Дунё” АА мухбири.

“Германия ташқи ишлар вазири Йоҳанн Вадефуль жаноблари билан учрашишдан мамнунмиз, – деб ёзди Ўзбекистон ташқи ишлар вазири ўзининг telegram-каналида. – Ўзбекистон–Германия ҳамкорлигининг ўсиб бораётган динамикасини қайд этдик. Савдо, инвестициялар, “яшил” энергетика, касбий таълим ва ўзаро боғлиқлик каби соҳалардаги ҳамкорликни янада кенгайтиришни муҳокама қилдик.

Шунингдек, халқаро ва минтақавий муҳим масалалар ҳамда бўлажак тадбирлар кун тартиби юзасидан фикр алмашдик”.