ТОШКЕНТ, 18 сентябрь. /“Дунё” АА/. Ўзбекистон ташқи ишлар вазири Бахтиёр Саидов Япония бизнес федерацияси – “Keydanren”да бўлиб ўтган давра суҳбатида иштирок этди, деб хабар бермоқда “Дунё” АА мухбири.

“Япония бизнес федерацияси – “Keydanren” раиси жаноб Такеши Хашимото ҳамда Япониянинг етакчи компаниялари раҳбар ва вакиллари билан давра суҳбати ўтказдик, – деб ёзди Ўзбекистон ТИВ раҳбари ўзининг telegram-каналида. – Давра суҳбатида “Mitsui O.S.K. Lines”, “Sojitz”, “All Nippon Airways”, “Shimizu”, “JETRO”, “Sumitomo”, “JBIC”, “Toyo Engineering”, “Toyota Tsusho”, “Marubeni”, “Mitsui”, “Mitsubishi” ва бошқа йирик япон компанияларининг вакиллари иштирок этди.

Учрашувда Ўзбекистон–Япония иқтисодий ҳамкорлигини янада кенгайтириш, япон компанияларининг мамлакатимиздаги фаолиятини қўллаб-қувватлаш ва янги инвестициявий лойиҳаларни амалга ошириш масалаларини муҳокама қилдик.

Энергетика, транспорт ва логистика, инфратузилма, қишлоқ хўжалиги, тўқимачилик, рақамлаштириш ва кадрлар тайёрлаш каби соҳалардаги янги имкониятларга алоҳида тўхталдик.

Бугунги очиқ ва амалий мулоқот япон бизнеси билан ҳамкорлигимизни аниқ лойиҳалар ва янги ташаббуслар билан бойитиш учун муҳим қадам бўлди”.

“Дунё” АА сурати