TOKIO, 12-oktyabr. /«Dunyo» AA/. O‘zbekiston diplomatlari Yaponiya parlamenti Vakillar palatasi deputati, Yaponiya–O‘zbekiston parlamentlararo do‘stlik ligasi Ijroiya qo‘mitasi raisi Keysuke Sudzuki bilan uchrashuv o‘tkazdi, deb xabar bermoqda «Dunyo» AA muxbiri.

Muloqot chog‘ida ikki mamlakat o‘rtasidagi kengaytirilgan strategik sheriklik munosabatlarini yanada mustahkamlash, oliy darajada erishilgan kelishuvlarni amalga oshirish hamda parlamentlararo aloqalarni faollashtirish masalalari muhokama qilindi.

Xususan, O‘zbekiston Prezidentining 2025-yil dekabr oyida Yaponiyaga rasmiy tashrifi va joriy yil sentyabr oyida Tokio shahrida bo‘lib o‘tgan Tashqi ishlar vazirlarining ikkinchi Strategik muloqoti doirasida erishilgan kelishuvlarning amaliy ijrosi ko‘rib chiqildi.

Shuningdek, savdo-iqtisodiy, investitsiyaviy, huquqiy sohalar hamda mehnat migratsiyasi yo‘nalishlaridagi hamkorlikni yanada rivojlantirish yuzasidan fikr almashildi.

Uchrashuv yakunlari bo‘yicha 2027-yilda O‘zbekiston va Yaponiya o‘rtasida diplomatik munosabatlar o‘rnatilganining 35-yilligiga bag‘ishlangan qo‘shma tadbirlarni ishlab chiqish, shuningdek, parlamentlararo va amaliy sheriklikni yanada jadallashtirish bo‘yicha kelishuvga erishildi.

Eslatib o‘tamiz, O‘zbekiston va Yaponiya o‘rtasida diplomatik munosabatlar 1992-yil 26-yanvarda o‘rnatilgan.