LONDON, 10-iyul. /“Dunyo” AA/. Katta Manchesterning sobiq meri Endi Bernemning Leyboristlar partiyasi yetakchiligi lavozimiga nomzodini 403 nafar deputatdan 322 nafari qo‘llab-quvvatladi, bu esa uni Buyuk Britaniya bosh vaziri etib tayinlanishiga yaqinlashtirdi, deb xabar bermoqda “Dunyo” AA muxbiri “BBC”ga tayanib.

Endi Bernem nomzodlar ko‘rsatish boshlanganidan buyon rasman eʼlon qilingan yagona nomzoddir. Boshqa birorta nomzod kurashga kira olmasligi uchun unga bor-yo‘g‘i bitta deputatning qo‘llab-quvvatlashi yetishmayapti. Ayrim deputatlarning so‘zlariga ko‘ra, ular 9 iyul kuni ovoz bera olmagan, biroq parlamentga qaytgach, Endi Bernemni qo‘llab-quvvatlash niyatida.

Agar kutilganidek, boshqa daʼvogarlar paydo bo‘lmasa, kelasi hafta u Leyboristlar partiyasining yangi rahbari deb rasman eʼlon qilinadi va 20-iyul kuni Buyuk Britaniya Bosh vaziri lavozimiga kirishadi.

Asosiy nomzod o‘z bayonotida deputatlarga bildirilgan ishonch uchun minnatdorlik bildirdi va bu qo‘llab-quvvatlash partiyaning turli qanotlari vakillaridan kelganini taʼkidladi. Bu, uning fikricha, “Buyuk Britaniyaga siyosatda yangicha yondashuv zarurligi haqidagi umumiy ishonch”ni aks ettiradi.

“Men hokimiyatni Vestminsterdan tashqariga olib chiqishni, iqtisodiyotni oddiy odamlar manfaatlarini ko‘zlab qayta qurishni hamda mamlakatning har bir hududida barqaror o‘sishni taʼminlashni taklif qilaman”, – dedi u.

Endi Bernem 2017-yildan beri Katta Manchester meri lavozimida ishlab kelayotgan edi. Bungacha u Jamoalar palatasida Li okrugi vakili bo‘lgan, Madaniyat vaziri, Sog‘liqni saqlash vaziri va G‘aznachilik bosh kotibi lavozimlarida ishlagan. U avvalroq, 2010 va 2015-yillarda ikki marta Leyboristlar partiyasiga rahbarlik qilishga uringan.

Endi Bernemning siyosiy nufuzi Meykerfild okrugidagi qo‘shimcha parlament saylovlaridagi g‘alabasidan so‘ng ortdi. May oyidagi mahalliy saylovlarda leyboristlarning jiddiy yo‘qotishlari fonida partiyadoshlari isteʼfoga chiqishga undagan Kir Starmerga bosim kuchaygan edi.

Eslatib o‘tamiz, Kir Starmer Endi Bernem deputat sifatida qasamyod qilgan kuni partiya yetakchiligidan ketishini eʼlon qilar ekan, navbatdagi umumxalq saylovlarida partiyaga yetakchilik qilish uchun eng yaxshi nomzod ekani borasidagi savolga javob olganini aytgan edi.

Nomzodlar 15-iyulgacha kamida 81 nafar leyborist deputatning qo‘llab-quvvatlashini to‘plagan holda o‘z nomzodini ilgari surishi mumkin. Bundan tashqari, Endi Bernem partiyaga aloqador 31 ta kasaba uyushmasi yoki sotsialistik tashkilotdan kamida uchtasining yordamini olishi kerak, bu esa qiyinchilik tug‘dirmasligi kutilmoqda.

Bir kun avval saylovda ishtirok etish imkoniyatini ko‘rib chiqayotgan sobiq mudofaa vaziri El Karns o‘z nomzodini qaytarib olib, Endi Bernemning raqobatsiz g‘alaba qozonishiga amalda yo‘l ochib berdi.