BUDAPESHT, 18-mart. /“Dunyo” AA/. Vengriyada Amir Temur va Temuriylar davrining boy madaniy-tarixiy hamda ilmiy merosiga bo‘lgan qiziqish tobora ortib bormoqda, deb xabar bermoqda “Dunyo” AA muxbiri.

Bu mamlakatda Markaziy Osiyo tarixi, madaniyati va ilmiy yutuqlari haqidagi bilimlarga bo‘lgan qiziqishning yuksalayotganini, shuningdek, gumanitar tadqiqotlar sohasida xalqaro hamkorlikni mustahkamlash istagini ifodalaydi.

2026-yil davomida Budapeshtda buyuk sarkarda, davlat arbobi, ilm-fan va sanʼat homiysi Amir Temur tavalludining 690 yilligiga bag‘ishlangan turkum ilmiy-madaniy tadbirlar o‘tkazilishi rejalashtirilgan.

Eng muhim voqealardan biri — 2026-yilda Budapeshtda bo‘lib o‘tadigan “Amir Temur va Temuriylar: tarix va ushbu davrning Markaziy Osiyo ilm-fani hamda madaniyati rivojiga taʼsiri” nomli xalqaro konferensiyadir. Ushbu anjuman ikki mamlakat olimlari uchun muloqot maydoniga aylanib, Temuriylarning mintaqa madaniy va ilmiy qiyofasini shakllantirishdagi o‘rni bo‘yicha ilg‘or tadqiqotlar almashish imkonini beradi.

2026-yilning mart oyida O‘zbekiston elchixonasi ko‘magida O‘zbekiston Fanlar akademiyasi Tarix instituti direktori Azamat Ziyo va Vengriya Fanlar akademiyasi Etnologiya instituti katta ilmiy xodimi David Shomfay Kara o‘rtasida onlayn-muzokaralar bo‘lib o‘tdi. Uchrashuv davomida ikki tomonlama hamkorlikning asosiy yo‘nalishlari kelishib olindi.

Bundan tashqari, vengriyalik tadqiqotchi Zahiriddin Muhammad Boburning mashhur asari — “Boburnoma”ning birinchi bobini venger tiliga tarjima qilishni yakunladi. Rejaga ko‘ra, 2026-yilning aprel oyida u Bobur hayoti va faoliyatida muhim o‘rin tutgan O‘zbekistonning tarixiy shaharlariga safar qiladi. Sayohat davomida tadqiqotchi kitobning venger tilidagi nashrini yevropalik kitobxonlar uchun imkon qadar ko‘rgazmali va tushunarli qilish maqsadida tarixiy obida va obyektlarni suratga olishni rejalashtirgan. O‘zbekiston Fanlar akademiyasi Tarix instituti ushbu loyihani qo‘llab-quvvatlash va uni amalga oshirishda faol ishtirok etishga tayyorligini bildirdi.

Tomonlar o‘zbek-venger ilmiy va madaniy hamkorligini, jumladan, qo‘shma nashriyot loyihalari, tadqiqotlar, taʼlim dasturlari va Markaziy Osiyo madaniy merosini o‘rganishga bag‘ishlangan tadbirlarni yanada kengaytirishdan manfaatdor ekanliklarini tasdiqladilar.