XANCHJOU, 9-sentabr. /“Dunyo”AA/. Xalqaro savdoni rivojlantirishga ko‘maklashish Xitoy qo‘mitasining (CCPIT) Chjeszyan provinsiyasi departamenti yillik sessiyasi doirasida O‘zbekiston investitsiyaviy salohiyatining taqdimoti bo‘lib o‘tdi, deb xabar bermoqda “Dunyo” AA muxbiri.

Tadbir ishtirokchilariga mamlakatimizda amalga oshirilayotgan islohotlar, iqtisodiyotni liberallashtirish va qulay investitsiya muhitini yaratish borasidagi chora-tadbirlar, shuningdek, O‘zbekiston va Xitoy o‘rtasidagi strategik sheriklik doirasida qo‘shma hududiy va tarmoq loyihalarini rivojlantirish imkoniyatlari haqida atroflicha maʼlumot berildi.

Xitoylik tadbirkorlarga O‘zbekistonning infratuzilmaviy imkoniyatlari hamda xorijiy investorlarni qo‘llab-quvvatlash choralari, jumladan, soliq va bojxona imtiyozlari, eksportni qo‘llab-quvvatlash hamda Markaziy Osiyo, MDH va Yevropa Ittifoqi bozorlariga chiqish afzalliklari tushuntirildi.

Chjeszyan provinsiyasi ishbilarmon doiralarida infratuzilma, energetika, kon-kon sanoati, qishloq xo‘jaligi va yuqori texnologiyalar sohalaridagi loyihalar katta qiziqish uyg‘otdi.

Tashkilotchilarning taʼkidlashicha, ushbu tadbir Chjeszyan provinsiyasi hamda Markaziy Osiyo va Shimoliy Afrika mamlakatlari o‘rtasidagi savdo-iqtisodiy hamkorlikni chuqurlashtirishga qaratilgan ishlarning mantiqiy davomi bo‘lib, o‘zaro savdo va investitsiyalar uchun yangi imkoniyatlar ochadi.