Fransiya va Polsha harbiy aloqa uchun sunʼiy yo‘ldosh yaratadi

Polsha va Fransiya Polsha qurolli kuchlari uchun himoyalangan harbiy aloqa kanalini taʼminlaydigan kosmik sunʼiy yo‘ldoshni hamkorlikda barpo etadi. Bu haqda 20-aprel, dushanba kuni Gdanskda bo‘lib o‘tgan qo‘shma uchrashuvda Fransiya prezidenti Emmanuel Makron va Polsha bosh vaziri Donald Tusk maʼlum qilgan.  

Manba: Deutsche Welle

***

Yangi Zelandiyada favqulodda holat eʼlon qilindi

Yangi Zelandiya poytaxti Vellington shahrida kuchli yomg‘ir va sel oqimlari sabab favqulodda holat joriy etildi. Yog‘ingarchilik shahar infratuzilmasiga jiddiy taʼsir ko‘rsatib, ko‘chalarni suv bosgan. Qariyb bir soat ichida 77 millimetr yomg‘ir yog‘gani qayd etildi. Tabiiy ofat oqibatida ko‘plab avtomobillar suv ostida qoldi, daraxtlar quladi va ayrim uylarga jiddiy zarar yetdi. Bir nechta maktablar yopildi, aeroportda esa reyslar bekor qilindi. Hukumat aholini uyda qolishga chaqirib, keraksiz harakatlarni cheklashni tavsiya qildi.

Manba: VVS

***

Koreyada yuk mashinasi namoyishchilarni bosib ketdi

Janubiy Koreyada yuk mashinasi SU logistik markazi oldida o‘tkazilayotgan norozilik namoyishi ishtirokchilarini bosib ketdi. Hodisa oqibatida 1 kishi halok bo‘ldi, yana 2 kishi jarohat oldi. Voqea Chinchju shahrida mahalliy vaqt bilan taxminan 10:32 da sodir bo‘lgan. Bu vaqtda yuk tashuvchilar kasaba uyushmasi aʼzolari kompaniya rahbariyati bilan muzokara talab qilib namoyish o‘tkazayotgan edi.

Manba: Yonhap   

***

Tramp: Eron har kuni 500 mln dollar yo‘qotmoqda

AQSh Prezidenti Donald Tramp Eron iqtisodiy jihatdan katta zarar ko‘rayotganini va har kuni taxminan 500 million dollar yo‘qotayotganini maʼlum qildi. Oq uy rahbariga ko‘ra, Eron har kuni taxminan 500 million dollarni “havoga sovuryapti”, AQSh esa bu vaziyatda zarar ko‘rmayapti. Trampning yozishicha, Eron Hormuz bo‘g‘ozida o‘t ochgan va bu sulh shartlarini buzish hisoblanadi.

Manba: Trampning “Truth Social”dagi rasmiy sahifasi

***

Apple kompaniyasida yangi bosh ijrochi direktor tayinlandi

“Apple” kompaniyasi Tim Kukning o‘rniga Jon Ternus yangi bosh ijrochi direktor etib tayinlanganini eʼlon qildi. Tim Kuk texnologiya gigantini 15 yil boshqarganidan so‘ng o‘z lavozimini tark etmoqda. Hozirda apparat muhandisligi bo‘limi rahbari bo‘lib ishlayotgan va Apple‘da 25 yillik tajribaga ega Jon Ternus o‘z vazifasiga 1-sentyabrdan kirishadi. Tim Kuk esa kompaniya ijrochi raisi lavozimiga o‘tadi.

Manba: BBC

***

Diplomatik mojaro: Kolumbiya va Ekvador prezidentlari sudlashmoqchi

Kolumbiya prezidenti Gustavo Petro Ekvador prezidenti Daniel Noboani tuhmatda ayblab, rasman sudga daʼvo arizasi kiritdi. Ikki qo‘shni davlat rahbarlari o‘rtasidagi munosabatlar keskinlashgani xalqaro hamjamiyat eʼtiborida bo‘lib turibdi. Ziddiyat Daniel Noboaning bayonotidan keyin avj oldi. U Kolumbiya yetakchisini 2025-yilda Ekvadorning Manta shahriga qilgan tashrifi davomida ashaddiy narkobaron “Fito” bilan yashirin aloqa o‘rnatganlikda ayblagan edi. Gustavo Petro bu iddaolarni qatʼiy rad etib, buni o‘zining siyosiy obro‘siga berilgan “qasddan qilingan zarba” deb atadi.

Manba: Washingtonpost    

***

Hindistonda zavod portlashi natijasida 25 kishi halok bo‘ldi

Hindiston janubidagi Taminladu shtatida joylashgan pirotehnika vositalari ishlab chiqariladigan zavodda yirik portlash sodir bo‘ldi. Hodisa oqibatida kamida 25 kishi halok bo‘lgani, 4 nafar ishchi esa jiddiy jarohat olgani aytilmoqda. Portlash Virudxunagar shahridagi Vanyaja mushakbozlik sanoati hududida sodir bo‘lgan. Rasmiylarning aytishicha, portlash yuz bergan paytda ishchilarning ish vaqti yakunlangan bo‘lsa-da, ular ishlayotgan bo‘lgan.

Manba: BBC   

***

Fransiya va Gretsiya mudofaa bitimini yana besh yilga uzaytiradi

Fransiya Prezidenti Emmanuel Makron kelasi hafta Gretsiyaga tashrif buyurib, ikki davlat o‘rtasidagi xavfsizlik va mudofaa bitimini yangilaydi. Fransiya va Gretsiya – uzoq yillik NATO ittifoqchilari 2021-yilda o‘zaro yordamni nazarda tutuvchi mudofaa kelishuvini imzolagan edi. Ushbu bitimga ko‘ra, tomonlardan biri hujumga uchrasa, ikkinchisi yordam berishi kerak. Shuningdek, kelishuv doirasida Afina Fransiyada ishlab chiqarilgan uchta fregat va taxminan 24 ta Dassault Rafale qiruvchi samolyotini xarid qilgan.

Manba: Reuters

***

Armanistonda 10 tonnaga yaqin Nestle bolalar ozuqasi yo‘q qilindi

Armanistonda “Nestle” kompaniyasining “NAN” brendidagi bolalar ovqatining 9700 kg miqdordagi partiyasi xavfli deb topilgach, yo‘q qilindi. Ushbu qaror aralashmalarda xavfli toksin mavjudligi tahdidini ko‘rsatgan laboratoriya tadqiqotlari natijalari olingandan so‘ng qabul qilindi. Bu haqda Armaniston oziq-ovqat xavfsizligi inspeksiyasi matbuot xizmati xabar berdi.

Manba: TASS