ASHXOBOD, 9-noyabr. /“Dunyo” AA/. Turkmanistonda bo‘lib o‘tgan “Baxtiyorlik davrining teatr san’ati” V xalqaro festivalida O‘zbekiston vakillari ham ishtirok etdi, deb xabar bermoqda “Dunyo” AA muxbiri.

Qator xorijiy davlatlar teatr jamoalarini birlashtirgan xalqaro madaniy forum doirasida Buxoro davlat musiqali drama teatri tomonidan Sulton Rayevning “Malikaning ko‘z yoshlari” dramasi taqdim etildi.

Namoyish Maxtumquli nomidagi Turkmaniston Milliy musiqali drama teatri sahnasida bo‘lib o‘tdi. Ushbu sahna asari festival ishtirokchilarida katta qiziqish uyg‘otdi.

Sahnalashtirilgan asar o‘zbek san’atkorlarining yuqori ijrochilik mahorati, milliy teatr maktabining o‘ziga xosligi va O‘zbekiston madaniy merosini namoyon qildi.

O‘zbekiston delegatsiyasining festivaldagi ishtiroki ikki mamlakat o‘rtasidagi madaniy-gumanitar aloqalarni mustahkamlash, ijodiy hamkorlikni kengaytirish va teatr san’ati vakillari o‘rtasida tajriba almashishni rivojlantirish yo‘lida muhim qadam bo‘ldi.