ISLOMOBOD, 8-oktabr. /“Dunyo” AA/. Pokistonning nufuzli “Global News Pakistan” axborot agentligi saytida O‘zbekiston va Turkmaniston o‘rtasidagi strategik sheriklik munosabatlariga bag‘ishlangan maqola e’lon qilindi, deb xabar bermoqda “Dunyo” AA muxbiri.

Maqola muallifining qayd etishicha, Avazada bo‘lib o‘tadigan Markaziy Osiyo davlatlari va Ozarbayjon rahbarlarining sakkizinchi Maslahat uchrashuvi O‘zbekiston–Turkmaniston munosabatlariga alohida mazmun bag‘ishlaydi. 

Nashrda ikki tomonlama munosabatlarning huquqiy poydevori 1996-yildagi Do‘stlik shartnomasiga borib taqalishi, yangi bosqich esa 2017-yil mart oyida Prezident Shavkat Mirziyoyevning Turkmanistonga amalga oshirgan ilk davlat tashrifi va strategik sheriklik to‘g‘risidagi hujjatning imzolanishi bilan boshlangani urg‘ulangan. 2022-yil 21-oktabrda imzolangan Deklaratsiya esa intilishlarini yanada mustahkamladi. Bu siyosiy kursning izchilligi oliy darajadagi muntazam muloqotlar, jumladan, Turkmaniston Prezidenti Serdar Berdimuhamedovning 2025-yil noyabr oyida O‘zbekistonga qilgan davlat tashrifi doirasida chegaraoldi savdosi, qishloq xo‘jaligi va sog‘liqni saqlash sohalarida erishilgan kelishuvlarda yaqqol namoyon bo‘lmoqda.

Maqolada ikki tomonlama yaqinlashuvning moddiy asosi tovar ayirboshlash hajmining jadal o‘sishida ko‘rinayotgani qayd etilgan. Xususan, savdo hajmi 2017-yildagi 177,9 million dollardan 2025-yilda 1,2 milliard dollarga yetgan. 2026-yil yanvar–avgust oylarida esa inklyuziv ko‘rsatkich 807,4 million dollarni tashkil etdi. Shuningdek, 2025-yil 25-fevraldan boshlab amal qilayotgan erkin savdo rejimi va transport-tranzit sohasidagi loyihalar hamkorlikni yanada kengaytirmoqda.

Yakunda rasmiy Toshkent va Ashxobod o‘rtasidagi sheriklik mintaqaviy xavfsizlik va barqaror rivojlanishning umumiy arxitekturasiga salmoqli hissa qo‘shayotgani alohida ta’kidlangan.