AL-KUVAYT, 16-iyul. /“Dunyo” AA/. Kuvaytning “Q8 Press” nashrida I Xalqaro islom sivilizatsiyasi forumi yakunlariga bag‘ishlangan maqola eʼlon qilindi, deb xabar bermoqda “Dunyo” AA muxbiri.

Nashrda qayd etilishicha, forum islom sivilizatsiyasi merosini o‘rganish, asrab-avaylash va targ‘ib qilish sohasida xalqaro hamkorlikni yangi bosqichga olib chiqadigan muhim tadbirga aylangan. Uning asosiy natijasi sifatida mazkur yo‘nalishdagi global hamkorlikni mustahkamlashga qaratilgan, o‘nta xalqaro tashabbusni qamrab olgan Toshkent deklaratsiyasining qabul qilingani bo‘ldi.

Ushbu deklaratsiya doirasida xalqaro tashkilotlar, ilmiy muassasalar, muzeylar, kutubxonalar va tadqiqot markazlarini birlashtiruvchi Jahon islom sivilizatsiyasi alyansini tashkil etish nazarda tutilgan.

Shuningdek, islom sivilizatsiyasi merosining jahon raqamli reyestri va kutubxonasini yaratish, xalqaro mukofot, jamg‘arma, ensiklopediya hamda muzeylar uyushmasini taʼsis etish rejalashtirilgan. Bundan tashqari, 2030-yilgacha mo‘ljallangan qo‘shma “Yo‘l xaritasi”ni ishlab chiqish ham deklaratsiyaning muhim tashabbuslaridan biri sifatida belgilangan.

“Q8 Press” nashrining yozishicha, anjumanda ilgari surilgan tashabbuslar sheriklikni rivojlantirish, tarixiy-madaniy merosni asrab-avaylash, tinchlik, o‘zaro hurmat va madaniyatlararo muloqot qadriyatlarini mustahkamlashga xizmat qiladi.