BUXORO, 6-iyun. /“Dunyo” AA/. Mamlakatimizda akkreditatsiyadan o‘tgan diplomatik korpus va xalqaro tashkilotlar vakillaridan iborat delegatsiyaning Buxoro shahriga tashrifi davom etmoqda, deb xabar beradi “Dunyo” AA muxbiri voqea joyidan.

Avval xabar qilinganidek, O‘zbekiston Tashqi ishlar vazirligi tomonidan uyushtirilgan ikki kunlik tashrifning birinchi kunida mehmonlar Buxoroning tarixiy va boqiy qadamjolarini ziyorat qilgan edilar.

Safarning ikkinchi kuni Buxoro viloyati hokimi Botir Zaripov bilan uchrashuvdan boshlandi. Tadbir davomida mutasaddi idora va tashkilotlar vakillari viloyatning iqtisodiy, sarmoyaviy hamda turizm salohiyati, shuningdek, turli sohalarda amalga oshirilayotgan loyihalar haqida batafsil ma’lumot berdilar.

Shuningdek, bugungi dastur doirasida xorijiy mehmonlarning viloyatdagi bir qator zamonaviy sanoat korxonalariga tashrifi va ularning ishlab chiqarish faoliyati, investitsiyaviy loyihalari hamda eksport salohiyati bilan tanishishi kutilmoqda.