TOSHKENT, 7-iyul. /“Dunyo” AA/. O‘zbekiston tashqi ishlar vaziri Baxtiyor Saidov bugun Gvineya-Bisau tashqi ishlar, xalqaro hamkorlik va hamjamiyatlar vaziri Fatumata Jau bilan telefon orqali muloqot qildi, deb xabar bermoqda “Dunyo” AA muxbiri.

“Gvineya-Bisau Respublikasi tashqi ishlar, xalqaro hamkorlik va jamiyatlar vaziri Fatumata Jau xonim bilan telefon orqali samimiy va mazmunli muloqot o‘tkazdik, – deb yozdi O‘zbekiston TIV rahbari o‘zining telegram-kanalida. – O‘zbekiston va Gvineya-Bisau o‘rtasidagi ikki tomonlama munosabatlarni rivojlantirish istiqbollarini muhokama qildik. Siyosiy muloqotni yo‘lga qo‘yish, tashqi ishlar vazirliklari o‘rtasida muntazam siyosiy maslahatlashuvlar mexanizmini shakllantirish, shartnomaviy-huquqiy bazani kengaytirish masalalariga alohida e’tibor qaratdik.

Shuningdek, BMT va Qo‘shilmaslik harakati doirasidagi hamkorlikni yana-da mustahkamlash yuzasidan fikr almashdik.

Mamlakatlarimiz o‘rtasidagi do‘stona munosabatlarni yana-da rivojlantirish va o‘zaro manfaatli hamkorlikni kengaytirish bo‘yicha yaqin muloqotni davom ettirishga kelishib oldik”.

Eslatib o‘tamiz, O‘zbekiston va Gvineya-Bisau o‘rtasida 2023-yil aprel oyida diplomatik munosabatlar o‘rnatgan.