ASHXOBOD, 26-iyun. /“Dunyo” AA/. Turkmanistonning yetakchi “Orient” axborot agentligi portalida “O‘zbekiston – texnologik biznes uchun operatsion xab: asosiy ko‘rsatkichlar, imkoniyatlar va muvaffaqiyat omillari” sarlavhali tahliliy maqola chop etildi, deb xabar bermoqda “Dunyo” AA muxbiri.

Maqolada taʼkidlanishicha, bugungi kunda O‘zbekiston MDH va xorijdagi 1000 dan ortiq texnologik kompaniyalar uchun o‘z operatsion ofislarini ko‘chirish va biznesni rivojlantirish bo‘yicha eng jozibador markazga aylandi. Bunga mamlakatda yaratilgan tanish ishbilarmonlik muhiti, maʼmuriy jarayonlarning soddalashtirilgani va “IT Park” tomonidan taqdim etilayotgan keng ko‘lamli infratuzilmaviy ko‘mak sabab bo‘lmoqda. Xususan, “One Stop Shop” yagona oyna tizimi orqali yuridik shaxslarni ro‘yxatdan o‘tkazish va bank hisob raqamlarini ochish tezkorlik bilan amalga oshirilsa, “Softlanding” dasturi xorijdan ko‘chib kelayotgan jamoalar va ularning oila aʼzolarini uy-joy hamda adaptatsiya masalalarida qo‘llab-quvvatlamoqda.

Agentlik “IT Park” rezidentlari uchun amal qilayotgan soliq imtiyozlariga alohida to‘xtalgan. O‘zbekistonda korporativ soliq, QQS va ijtimoiy soliqlar 0 foizni tashkil etishi, jismoniy shaxslardan olinadigan daromad solig‘i esa 7,5 foiz etib belgilangani axborot texnologiyalari biznesi uchun mintaqadagi eng raqobatbardosh sharoitlardan biridir. Shuningdek, “Zero Risk” dasturi doirasida kompaniyalarga mebel va texnika bilan jihozlangan tayyor bepul ofislar taqdim etilishi, xodimlarni ishga olish va o‘qitish xarajatlari hamda ish haqi fondining 15 foizgacha qismi davlat tomonidan qoplab berilishi startaplarga moliyaviy daromadlarsiz faoliyat boshlash imkonini beradi.

Investorlar va IT mutaxassislari uchun yaratilgan qulayliklar sirasida 3 yil muddatga beriladigan maxsus “IT-viza” alohida qayd etilgan. Ushbu viza egalari mamlakat fuqarolari bilan teng ravishda tibbiy va taʼlim xizmatlaridan foydalanish, shuningdek, hech qanday cheklovlarsiz ko‘chmas mulk sotib olish huquqiga ega bo‘ladilar. Yevropa va Osiyo bozorlari o‘rtasida qulay geosiyosiy makonda joylashgan O‘zbekiston endilikda nafaqat relokatsiya markazi, balki xalqaro BPO (biznes jarayonlar autsorsingi) va texnologik eksport xabi sifatida ham faol namoyon bo‘lmoqda.

Maqola yakunida O‘zbekistonning global reytingdagi tarixiy yutug‘i eʼtirof etilgan. Tan olingan “StartupBlink” xalqaro tahliliy markazining “Global Startup Ecosystem Index 2026” hisobotiga ko‘ra, O‘zbekiston startap-ekosistemasi bir yilda 225 foizdan ortiq o‘sish namoyish etib, dunyoda “Yil mamlakati” maqomini qo‘lga kiritdi va global reytingda 19 pog‘onaga ko‘tarilib, 79-o‘rinni egalladi. Bugungi kunda mamlakatning “Startup Base” platformasida 1,9 mingdan ziyod startap loyihalar ro‘yxatdan o‘tgan bo‘lib, sohaga jalb qilingan umumiy investitsiyalar hajmi 400 million AQSH dollaridan oshgani O‘zbekistonning to‘laqonli yuqori texnologik markazga aylanganidan dalolat beradi.