TEHRON, 27 aprel. /“Dunyo” AA/ Tehron Vashingtonga asosiy masalalarni aniqlash va yadroviy mavzu muhokamasini keyingi bosqichga ko‘chirishni nazarda tutuvchi bosqichma-bosqich muloqot formatini taklif qildi, deb xabar bermoqda “Dunyo” AA muxbiri “Axios” portaliga tayanib.

Manbaga ko‘ra, Eron tomoni birinchi navbatda harbiy eskalatsiyani to‘xtatish, Eron va uning mintaqadagi ittifoqchi kuchlari uchun xavfsizlik kafolatlarini ishlab chiqishga eʼtibor qaratishni taklif qilmoqda. Jahon neft taʼminoti uchun strategik muhim yo‘nalish bo‘lgan Hurmuz bo‘g‘ozini ochish masalasi alohida band sifatida ko‘rib chiqilmoqda.

Qayd etilishicha, Eron rejasi uch bosqichni o‘z ichiga oladi: mojaroni to‘xtatish va xavfsizlik kafolatlarini yaratish, Hurmuz bo‘g‘ozini boshqarish mexanizmlarini muhokama qilish hamda shundan keyingina Eron yadroviy dasturi masalalariga qaytish. Shu bilan birga, Tehron yadroviy masalani muhokama qilish faqat dastlabki ikki band bo‘yicha kelishuvga erishilgandan keyingina mumkinligini taʼkidlamoqda.

“Axios” maʼlumotlariga ko‘ra, Vashingtonda bu tashabbusga ehtiyotkorlik bilan qaraydi. Amerika rasmiylari Hurmuz bo‘g‘ozi blokadasini bekor qilish va Eronga bosim o‘tkazishni to‘xtatish AQSHning muzokaralardagi pozitsiyasini zaiflashtirishi mumkin, deb hisoblaydi. Gap asosiy talablar, jumladan, uranni boyitishni cheklash va Eronning boyitilgan material zaxiralarini mamlakatdan tashqariga olib chiqish haqida bormoqda.

Diplomatik boshi berk ko‘cha fonida AQSH prezidenti Donald Tramp milliy xavfsizlik jamoasi bilan yig‘ilish o‘tkazdi. Muhokama chog‘ida Eronga nisbatan keyingi qadamlar va mumkin bo‘lgan bosim ssenariylari ko‘rib chiqildi.

Prezident Vashington muzokara delegatsiyalarini uzoq xorijiy safarlarga, jumladan, ilgari Pokistonda muhokama qilingan maslahatlashuvlarga yuborishni rejalashtirmayotganini va muzokaralarning cheklangan formatda o‘tkazilishiga ruxsat berishini aytdi.

Avvalroq, amerikalik muzokarachilar Stiven Uitkoff va Jared Kushnerning muzokaralarning navbatdagi raundi o‘tkazilishi kerak bo‘lgan Islomobodga tashrifi bekor qilingani xabar qilingandi.

Ayni paytda Livan janubida Isroil va “Hizbulloh” harakati o‘rtasida harbiy to‘qnashuvlar davom etmoqda. BBC maʼlumotlariga ko‘ra, Isroil tomoni Livan hududidagi obyektlarga yangi zarbalar berib, harakat aʼzolari va infratuzilmani yo‘q qilganini maʼlum qilgan.

Isroil harbiylarining taʼkidlashicha, operatsiyalar xavfsizlikka tahdidlarning oldini olishga qaratilgan, “Hizbulloh” esa bunga javoban javob qaytarmoqda. Rasmiy sulhga qaramay, vaqtinchalik tinchlik kelishuvi beqaror bo‘lib qolmoqda va muntazam ravishda buzilishlar bilan kechmoqda.

“AFP” agentligi surati