TOSHKЕNT, 29-sentabr. /“Dunyo” AA/. O‘zbekiston va Kuvayt tashqi ishlar vazirliklari o‘rtasidagi siyosiy maslahatlashuvlarning 3-davrasi videokonferensaloqa tarzida tashkil etildi, deb xabar bermoqda “Dunyo” AA muxbiri.

TIV ma’lumotiga ko‘ra, delegatsiyalarga O‘zbekiston tashqi ishlar vazirining birinchi o‘rinbosari Bahromjon A’loyev va Kuvayt Davlati tashqi ishlar vazirining Osiyo masalalari bo‘yicha o‘rinbosari Navvof Abdullatif al-Ahmad boshchilik qildi.

Muzokaralarda ikki davlat o‘rtasida siyosiy muloqotni mustahkamlash, savdo-iqtisodiy, investitsiyaviy va madaniy-gumanitar aloqalarni rivojlantirish, xalqaro tashkilotlar doirasida hamkorlikni kengaytirish masalalari muhokama qilindi, mintaqaviy dolzarb mavzular yuzasidan fikr almashildi.