MINSK, 7-avgust. / “Dunyo” AA/. O‘zbekiston elchisi Nuriddin Mamajonov Belarus Davlat bojxona qo‘mitasi raisi Vladimir Orlovskiy bilan uchrashdi, deb xabar bermoqda “Dunyo” AA muxbiri.

Uchrashuv davomida o‘zaro tovar aylanmasini ikki baravarga oshirish hamda amaldagi sanksiya cheklovlari sharoitida chegaralarda yuklar ushlanib qolishining oldini olish maqsadida tovarlarni bojxona rasmiylashtiruvidan o‘tkazishni jadallashtirish masalalari muhokama qilindi.

Bojxona tartib-qoidalarini raqamlashtirish hamda Belarus hukumati va O‘zbekiston hukumati o‘rtasidagi Tovarlarning kelib chiqishini sertifikatlash elektron tizimlarini o‘zaro tan olish to‘g‘risidagi Bitim qoidalariga muvofiq maʼlumotlarning avtomatik almashinuviga o‘tish muhimligiga alohida eʼtibor qaratildi.

Tomonlar, shuningdek, Belarus bojxona postlarida qo‘shma ishlarni tashkil etish va yuzaga kelayotgan masalalarni tezkorlik bilan hal etish masalalarini ko‘rib chiqdilar. Uchrashuv yakunlari bo‘yicha O‘zbekiston Bojxona qo‘mitasi so‘rovlarini ko‘rib chiqish va ijro etishni jadallashtirish bo‘yicha kelishuvga erishildi.