TOSHKЕNT, 11-noyabr. /“Dunyo” AA/. Antaliya shahrida bo‘lib o‘tayotgan Jahon iqlim sammiti doirasida O‘zbekiston Prezidenti Shavkat Mirziyoyev bugun BMT bosh kotibining o‘rinbosari, BMTning Cho‘llanishga qarshi kurashish konvensiyasi ijrochi kotibi Yasmin Fuad bilan uchrashuv o‘tkazdi, deb xabar bermoqda “Dunyo” AA muxbiri.

Davlatimiz rahbari matbuot xizmati ma’lumotiga ko‘ra, cho‘llanishga qarshi kurashish, tanazzulga uchragan yerlarni tiklash va iqlim o‘zgarishi oqibatlarini bartaraf etish sohalaridagi hamkorlikni kengaytirish masalalari ko‘rib chiqildi.

Samarali hamkorlik doirasida so‘nggi besh yil davomida 15 ta qo‘shma loyiha amalga oshirilgani mamnuniyat bilan qayd etildi.

Orolbo‘yi hududida ekologik muvozanatni tiklash, o‘rmonlar maydonini kengaytirish va qurg‘oqchil ekotizimlar barqarorligini oshirish masalalariga alohida e’tibor qaratildi.

Uglerod yutilishini hisobga olish mexanizmlarini takomillashtirish va karbon moliyasi mablag‘larini jalb etish muhimligi ta’kidlandi.

Uchrashuv yakunida cho‘llanishga qarshi kurashish va ekologik barqarorlikni ta’minlash sohalarida sheriklikni yanada mustahkamlash hamda qo‘shma tashabbuslarni ilgari surish yuzasidan kelishuvga erishildi.