“The Azb”: 2017–2025-yillarda O‘zbekiston va Iordaniya o‘rtasidagi tovar aylanmasi qariyb o‘n baravarga o‘sdi
Noyabr 20, 2026. 11:00 • 3 daq
• 12
ISLOMOBOD, 20-noyabr. /“Dunyo” AA/. Pokistonninng “The Azb” nashrida “O‘zbekiston va Iordaniya iqtisodiy sheriklikning yangi bosqichi sari” sarlavhali maqola e’lon qilindi, deb xabar bermoqda “Dunyo” AA muxbiri.
Maqolada yozilishicha, O‘zbekiston va Iordaniya o‘rtasida diplomatik munosabatlar 1993-yil 15-fevralda o‘rnatilgan. Munosabatlarning yangi faol bosqichi 2025-yil avgust oyida Iordaniya Qiroli Abdulla II ibn al-Husaynning O‘zbekistonga davlat tashrifi bilan bog‘liq.
Samarqandda bo‘lib o‘tgan uchrashuvda investitsiyalarni o‘zaro rag‘batlantirish va himoya qilish, qo‘shma komissiya tashkil etish, turizm, qishloq xo‘jaligi, oliy ta’lim va boshqa sohalarga oid jami 15 ta ikki tomonlama hujjat imzolandi. Bu hujjatlar keyingi iqtisodiy muloqot uchun institutsional asos yaratdi.
Nashrda ikki mamlakat o‘rtasidagi savdo-iqtisodiy aloqalar holati haqida ham so‘z yuritilgan. Ta’kidlanishicha, 2017–2025-yillarda O‘zbekiston va Iordaniya o‘rtasidagi tovar aylanmasi 850 ming dollardan 8,53 mln dollargacha, ya’ni qariyb o‘n baravarga o‘sdi.
O‘zbekiston Iqtisodiy tadqiqotlar va islohotlar markazi tahliliga ko‘ra, O‘zbekiston eksport salohiyatiga ega bo‘lgan tovar guruhlari bo‘yicha Iordaniyaning 2025-yilgi umumiy importi qariyb 8,9 mlrd dollarga teng. Bu Iordaniya importining 31 foizini tashkil etadi va o‘zbek ishlab chiqaruvchilari uchun keng bozor imkoniyatlari mavjudligini ko‘rsatadi.
Eksport geografiyasini kengaytirishda mahsulotlarni sertifikatlash, savdo uylari faoliyatini yo‘lga qo‘yish, mahalliy distribyutorlar bilan aloqalarni rivojlantirish va biznes-forumlar tashkil etish muhim ahamiyatga ega. Bunday hamkorlik O‘zbekiston mahsulotlarining Iordaniya bozoridagi ishtirokini kengaytirishga xizmat qiladi.
Materialda O‘zbekistonda Iordaniya kapitali ishtirokida 18 ta korxona ro‘yxatdan o‘tgani, ularning 4 tasi qo‘shma korxona, 14 tasi esa to‘liq Iordaniya kapitali asosida tashkil etilgani to‘g‘risidagi ma’lumotlar o‘quvchilar e’tiboriga taqdim etilgan.
Sanoat kooperatsiyasi uchun to‘qimachilik istiqbolli yo‘nalishlardan biridir. O‘zbekistonda ishlab chiqarilgan ip-kalava va trikotaj matolari asosida Iordaniya sanoat zonalarida tayyor kiyim ishlab chiqarish imkoniyatlarini o‘rganish mumkin.
Farmatsevtika sohasidagi hamkorlik ham alohida imkoniyatlarga ega. Iordaniya dori vositalari ishlab chiqarishda shakllangan sanoat bazasiga ega bo‘lib, mamlakatda tayyorlangan farmatsevtika mahsulotlarining qariyb 75 foizi eksport qilinadi.
O‘zbekiston va Iordaniya munosabatlarida 2025-yilgi oliy darajadagi muzokaralar va imzolangan hujjatlar yangi amaliy bosqich uchun asos yaratdi. 2026-yil noyabrida Ammanda o‘tkazilishi rejalashtirilgan biznes-forum va ko‘rgazma esa ikki mamlakat kompaniyalari o‘rtasidagi to‘g‘ridan to‘g‘ri aloqalarni kengaytirish imkonini berishi kutilmoqda.
Material xulosasida qayd etilishicha, savdo turlarini kengaytirish, to‘g‘ridan to‘g‘ri shartnomalarni ko‘paytirish va qo‘shma sanoat loyihalarini rivojlantirish iqtisodiy sheriklikning istiqbolli yo‘nalishlaridir. O‘zbekistonning ishlab chiqarish salohiyati va Iordaniyaning tashqi savdo hamda sanoat tajribasi ikki mamlakat uchun yangi iqtisodiy imkoniyatlar ochadi.
Telegram kanalimizga obuna bo‘ling
Barcha yangiliklar va yangilanishlardan birinchi bo‘lib xabardor bo‘ling!
So‘nggi yangiliklar
Barchasi