SHAHRISABZ, 13-avgust. /“Dunyo” AA/. Bugun Qashqadaryo viloyatining Shahrisabz tumanida milliy hunarmandchilik va noyob kashtachilik sanʼatini keng ommalashtirishga bag‘ishlangan uch kunlik “Iroqi” xalqaro kashtachilik festivali boshlanmoqda, deb xabar bermoqda “Dunyo” AA muxbiri.

O‘zbekiston Turizm qo‘mitasi maʼlumotiga ko‘ra, festival asrlar davomida avloddan-avlodga o‘tib kelayotgan milliy kashtachilik anʼanalarini namoyish etish, mohir ustalar ijodini ommalashtirish va ushbu sanʼat turiga bo‘lgan qiziqishni oshirishga qaratilgan.

Tadbirda O‘zbekistonning turli hududlaridan, shuningdek, qo‘shni davlatlardan kelgan mohir kashtachilar ishtirok etib, o‘z ijodlarining noyob va qimmatli namunalarini namoyish etadilar.

Festival doirasida quyidagilar ko‘zda tutilgan:

- milliy kashtachilik namunalari ko‘rgazmasi;

- hunarmandlarning ijodiy ishlari taqdimoti;     

- kashtachilik bo‘yicha mahorat darslari;

-milliy hunarmandchilikka bag‘ishlangan ko‘rgazma va taqdimotlar;

- madaniy-ko‘ngilochar tadbirlar;

-mahalliy va xorijiy ustalar o‘rtasida tajriba almashish tadbirlari.

Festival 15 avgustga qadar davom etadi.