SHIMKENT, 13-oktyabr. /«Dunyo» AA/. Qozog‘istonning Shimkent shahrida o‘zbek tili, madaniyati, milliy an’analari va ma’naviy merosiga bag‘ishlangan bayram tadbiri tashkil etildi, deb xabar bermoqda «Dunyo» AA muxbiri.

Uchrashuvda davlat organlari, jamoat tashkilotlari, etnomadaniy birlashmalar va ta’lim muassasalari vakillari, san’at namoyandalari, hunarmandlar, mahalliy aholi va mehmonlar ishtirok etdi.

Bayramning asosiy maqsadi o‘zbek xalqining milliy-madaniy merosini asrab-avaylash, ona tilini rivojlantirish, an’analarni yosh avlodga yetkazish hamda qozoq va o‘zbek xalqlari o‘rtasidagi do‘stlik va yaxshi qo‘shnichilik munosabatlarini mustahkamlashdan iborat bo‘ldi.

Tadbirda Shimkent shahri hokimi o‘rinbosari Sarsen Quranbek, Qozog‘iston Xalq assambleyasi qo‘mitasi raisi Marat Azilxanov, «Do‘stlik» o‘zbek etnomadaniy birlashmalari assotsiatsiyasi raisi Abdulla Ismatullayev hamda O‘zbekistonning Olmaota shahridagi bosh konsuli Raushanbek Matchanov mavzu yuzasidan so‘z yuritdi.

Bayram dasturidan xalq hunarmandchiligi, amaliy bezak san’ati va tasviriy san’at ko‘rgazmalari alohida o‘rin oldi. Ularda milliy naqqoshlik, qo‘l mehnati namunalari, kartinalar va an’anaviy bezak buyumlari namoyish etildi.

Mazkur ko‘rgazmalar o‘zbek xalqining boy badiiy merosi, hunarmandlar mahorati va milliy qadriyatlarni avloddan avlodga yetkazishdagi amaliy tajribasini aks ettirdi.

Milliy taomlar taqdimoti ham mehmonlarda katta qiziqish uyg‘otdi. An’anaviy taomlar va shirinliklar orqali o‘zbek oshxonasining o‘ziga xosligi, oilaviy qadriyatlar va mehmondo‘stlik an’analari namoyon bo‘ldi.

Tadbirda ta’lim muassasalari, jumladan, o‘zbek tilida ta’lim beruvchi maktablarning ishtiroki ona tilini saqlash va milliy o‘zlikni anglash masalalariga alohida e’tibor qaratdi. Robototexnika sohasidagi ishlanmalar milliy an’analarni zamonaviy ta’lim va innovatsiyalar bilan uyg‘unlashtirish mumkinligini ko‘rsatdi.

Konsert dasturida milliy kuy-qo‘shiqlar va o‘zbek raqslari namoyish etildi. Ijodiy jamoalarning chiqishlari o‘zbek san’atining o‘ziga xosligini namoyon etib, turli millat vakillarini bir davra atrofida birlashtirdi.