PEKIN, 7-fevral. /“Dunyo” AA/. Xitoydagi “Travel & Leisure” nashri bosh muharriri Yan Szipin “Dunyo” AA muxbiriga O‘zbekiston Prezidentining Pokistonga davlat tashrifi, ikki davlat o‘rtasida o‘rnatilgan o‘zaro ishonch va do‘stlik rishtalari hamda rivojlanayotgan hamkorlik aloqalari xususida fikr bildirdi:

– O‘zbekiston va Pokiston hamkorligi ko‘p qirrali va izchil rivojlanib bormoqda. Munosabatlarning iqtisodiy tarkibiy qismi barqaror o‘sishni ko‘rsatmoqda. O‘zaro savdo hajmining o‘sishi muhim ahamiyatga ega bo‘lib, 2025-yil yakuniga ko‘ra, 445,8 million dollarga yetdi. Bu ishbilarmon doiralar o‘rtasidagi ishonchning mustahkamlanishini aks ettiradi. Tovar ayirboshlashni 2 milliard dollarga yetkazish bo‘yicha ulkan maqsad qo‘yilgani bejiz emas.

Xalqaro maydonda O‘zbekiston va Pokiston SHHT va IHT kabi tashkilotlar doirasida saʼy-harakatlarni yaqindan muvofiqlashtirib, ko‘p qutblilik, suverenitet va ichki ishlarga aralashmaslik tamoyilini mustahkamlash tarafdori. Bu hamkorlik mintaqaviy barqarorlik va integratsiyaning muhim omili bo‘lib xizmat qiladi.

Transport-logistika o‘zaro bog‘liqligini rivojlantirishga alohida strategik eʼtibor qaratilmoqda. O‘zbekiston uchun Pokistonning Karachi va Gvadar portlariga chiqish muhim ahamiyatga ega bo‘lib, bu eksport-import yo‘nalishlarini diversifikatsiya qilish uchun yangi istiqbollarni ochadi.

“O‘zbekiston–Afg‘oniston–Pokiston” formatidagi uch tomonlama Trans-Afg‘on temir yo‘li qurilishi bu sohadagi eng muhim loyihadir. 2025-yil iyul oyida hadli bitimning imzolanishi transport xarajatlari va vaqtini keskin qisqartirishga, Markaziy va Janubiy Osiyo o‘rtasidagi iqtisodiy hamkorlikni mustahkamlashga qodir loyihani amalga oshirishga o‘tishni belgilab berdi.

O‘zbekiston Prezidenti Shavkat Mirziyoyevning Pokistonga tashrifi strategik sheriklikni yangi bosqichga ko‘tarish, iqtisodiy va transport hamkorligini kengaytirish, gumanitar aloqalarni chuqurlashtirishga turtki beradi.

Umuman olganda, XXR Toshkent va Islomobod o‘rtasidagi o‘zaro hamkorlikning rivojlanishini olqishlaydi, ular Xitoyning har qanday sharoitdagi strategik hamkorlari bo‘lib, SHHT va “Makon va yo‘l” tashabbusi doirasida faol hamkorlik qilmoqda.