TOSHKENT, 24-iyul. /“Dunyo” AA/. O‘zbekiston Prezidenti Shavkat Mirziyoyev bugun Iordaniya Podshohi Abdulla II ibn al-Husayn bilan telefon orqali suhbatlashdi, deb xabar bermoqda “Dunyo” AA muxbiri.

Davlatimiz rahbari matbuot xizmati maʼlumotiga ko‘ra, Iordaniya Podshohi O‘zbekiston Prezidentini tug‘ilgan kuni bilan samimiy muborakbod etib, mustahkam sog‘liq, baxt-saodat, do‘st O‘zbekiston xalqiga tinchlik-omonlik va farovonlik tiladi.

Muloqot davomida Samarqandda o‘tgan sermahsul muzokaralar va erishilgan muhim kelishuvlar aloqalarimizda yangi sahifa ochgani alohida qayd etildi.

Mamlakatlarimiz o‘rtasida parlamentlararo, ishbilarmonlik va madaniy-gumanitar almashinuvlar kengayib borayotgani mamnuniyat bilan taʼkidlandi.

Yetakchilar siyosiy muloqotni davom ettirish, savdo-iqtisodiy aloqalarni yana-da chuqurlashtirish hamda oliy darajadagi bo‘lajak tadbirlarga puxta tayyorgarlik ko‘rish muhimligiga urg‘u berishdi.

Xalqaro va mintaqaviy ahamiyatga molik dolzarb masalalar yuzasidan ham fikr almashildi.