ANQARA, 5-avgust. / "Dunyo" AA/. Mamlakatimiz mustaqilligining 34 yillik tantanalari arafasida Turkiyada O'zbekiston madaniyatini targ'ib etishga qaratilgan bir qator tadbirlar tashkil etildi, deb xabar qilmoqda "Dunyo" AA muxbiri.

Jumladan, Xalqaro Turkiy madaniyat tashkiloti – Turksoy, hamda Anqara shahri tumanlari hokimliklari bilan hamkorlikda "Turkiy dunyo festivali" o'tkazildi.

Festivalda Toshkent viloyati Madaniyat bosh boshqarmasi ijodiy jamoalari vakillari faol ishtirok etdi. O'zbekiston jamoasi ijrosidagi milliy kuy-qo'shiqlarimiz, "Lazgi", "Dilhiroj" va "Andijoncha" kabi raqslarimiz tashrif buyurganlarda katta qiziqish uyg'otdi.

Tadbirda so'z olganlar turkiy xalqlar o'rtasidagi tarixiy yaqinlik, so'nggi yillarda izchil rivojlanib borayotgan madaniy-gumanitar sohalardagi hamkorlik aloqalariga alohida to'xtalib o'tdilar.

Shuningdek, "Poytaxt madaniy uchrashuvlari" nomli yana bir tadbir Anqara shahar hokimiyati mezbonligida tashkil etildi.

Unda O'zbekistondan kelgan yosh ijodkorlar – Davlat milliy raqs va xoreografiya oliy maktabi talabalari ishtirok etdi. Balet spektakllaridan parchalar, milliy va jahon xalqlari raqslari namunalarini ijro etgan yosh o'zbek san'atkorlarining chiqishlari tomoshabinlarning ulkan e'tirofiga sazovor bo'ldi.