SAMARQAND, 29-oktyabr. /"Dunyo" AA/. Samarqandda bo'lib o'tgan YUNESKOning XIV Yoshlar forumining gvineyalik ishtirokchisi Elhaj Amadu Uri Barri "Dunyo" AA uchun intervyusida mazkur forum haqidagi fikrlarini bildirdi:

– Men uchun bu forumning tashkil etilishi juda muhim, chunki men bu yerga Gineyadan o'z mamlakatimni taqdim etish uchun delegat sifatida keldim. O'z yurtim delegati bo'lish va millatim nomidan so'zlash men uchun katta sharaf.

Avvalo, shuni ta'kidlamoqchimanki, o'zbekistonliklar ajoyib mehmondo'stlik ko'rsatishdi. Bizni juda iliq kutib olishdi va bu yerda bo'lgan ilk daqiqalardan boshlab o'zimizni xuddi uyimizdagidek his qilyapmiz. O'zbekistondagi muhit tinch, samimiy va qulay – bu ajoyib taassurot qoldirmoqda.

YUNESKO Yoshlar forumiga kelsak, bu haqiqatan ham g'ayrioddiy voqea. Bu galgi forum o'n to'rtinchisidir. Bu yil forumning asosiy mavzusi iqlim choralari va ularning ijtimoiy oqibatlari, ayniqsa, yoshlarning roliga bag'ishlangan.

Yosh avlod bu muhokamalar markazida turishi kerakligiga aminman, chunki bejizga: "Bugungi yoshlar – ertangi dunyoning kelajagi" deyishmaydi.

Hatto o'zimga savol berdim – bu forumni aynan Samarqandda o'tkazishni kim taklif qildi? Bu, shubhasiz, ajoyib qaror. Bu yerda o'ziga xos energiya his qilinadi va menimcha, barcha ishtirokchilar mamnun. Nafaqat men, balki do'stlarim ham bu tuyg'uni baham ko'rishmoqda – bu yerda hamma o'zini juda qulay his qilmoqda va xursand.

Boshqa ishtirokchilar va do'stlarim bilan faol muloqot qilyapman, ularga Samarqand haqida gapirib beryapman – va aytishim kerakki, bu shahar chindan ham hayratga sazovor.