TOSHKENT, 6-avgust. /"Dunyo" AA/. Xitoyga tashrif doirasida Bosh vazir o'rinbosari Jamshid Xo'jayev boshchiligidagi O'zbekiston delegatsiyasi Xitoyning "China National Gold Group" milliy oltin qazib olish korporatsiyasi vakillari bilan muzokaralar o'tkazdi, muzokaralar yakunida ikki tomonning investitsiyaviy hamkorlikni yanada rivojlantirish va chuqurlashtirish to'g'risidagi Memorandum imzolandi, deb xabar bermoqda "Dunyo" AA muxbiri.

Investitsiyalar, sanoat va savdo vazirligi ma'lumotiga ko'ra, erishilgan kelishuvlarga muvofiq, "China National Gold Group" kompaniyasi qimmatbaho va strategik ahamiyatga ega foydali qazilmalar konlarining istiqbolli uchastkalarida geologik qidiruv ishlarini amalga oshirish, yer osti boyliklaridan foydalanish, yuqori qo'shimcha qiymatga ega mahsulotlar ishlab chiqarish, zamonaviy texnologiyalarni joriy etish, mutaxassislar tayyorlash, shuningdek, ustuvor loyihalarga investitsiyalar jalb etish yo'nalishlarida hamkorlikni kengaytiradi.