TOSHKENT, 29-noyabr. /"Dunyo" AA/. O'zbekiston tashqi ishlar vaziri o'rinbosari Olimjon Abdullayev kecha Rossiya elchisi Oleg Malginov bilan uchrashdi, deb xabar qilmoqda "Dunyo" AA muxbiri.

TIV ma'lumotiga ko'ra, muloqotda tashqi mehnat migratsiyasini tartibga solish, O'zbekiston fuqarolarining xorijdagi himoyasi va huquqlarini ta'minlashda Tashqi ishlar vazirligi oldida turgan vazifalar muhokama qilindi.

Yuqoridagi masalalar yuzasidan fikr almashildi va O'zbekiston fuqarolarini Rossiya korxonalariga mehnat faoliyatini tashkiliy ravishda jalb qilish bo'yicha qo'shma chora-tadbirlar to'g'risida bir qator konstruktiv kelishuvlarga erishildi. Rossiya tomoni O'zbekiston fuqarolarini Rossiyaga ishlash uchun tashkiliy ravishda jo'natishdan manfaatdorligini tasdiqladi.

Migratsiyani tartibga solish masalalarini muhokama qilish masalalarida O'zbekiston Tashqi ishlar vazirligi, Migratsiya agentligi, O'zbekiston Ichki ishlar vazirligi va Rossiya elchixonasi mas'ul xodimlari o'rtasida har hafta ikki tomonlama uchrashuvlar o'tkazish uchun ishchi format yaratish bo'yicha kelishuvga erishildi.

"Dunyo" AA surati