TOSHKENT, 31-may. /"Dunyo" AA/. Tokio shahrida amaliy tashrif bilan bo'lib turgan O'zbekiston tashqi ishlar vaziri o'rinbosari Olimjon Abdullayev 28-may kuni Yaponiya tashqi ishlar vazirining parlamentar o'rinbosari Xisashi Matsumoto bilan uchrashuv o'tkazdi, deb xabar qilmoqda "Dunyo"AA muxbiri.

TIV ma'lumotiga ko'ra, uchrashuvda vizani liberallashtirish, gumanitar va biznes almashinuvi, xavfsizlik bo'yicha tavsiyalarni qayta ko'rib chiqish, shuningdek, mehnat migratsiyasi va turizm sohalarida hamkorlikni kengaytirish masalalariga alohida e'tibor qaratildi.

Xisashi Matsumoto O'zbekiston-Yaponiya munosabatlari rivojlanishining ijobiy dinamikasini qayd etib, Yaponiya Markaziy Osiyodagi asosiy hamkor sifatida O'zbekiston bilan hamkorlikni mustahkamlash tarafdori ekanini alohida ta'kidladi va uning yanada chuqurlashishiga umid bildirdi.

Tomonlar o'zaro hamkorlikning barcha sohalarida tashqi ishlar vazirliklari o'rtasida yaqin aloqalarni davom ettirishga tayyor ekanliklarini tasdiqladilar.