SEUL, 12-may. /"Dunyo" AA/. Janubiy Koreyaning  Namvon va Degu shaharlarida "O'zbekiston va Janubiy Koreya o'rtasida madaniy almashinuv" yiliga bag'ishlangan konsert dasturlari tashkil etildi, deb xabar bermoqda "Dunyo" AA muxbiri.

Madaniy tadbirlar O'zbekiston elchixonasi tashabbusi bilan Namvon va Degu shaharlari hokimliklari hamda Bongsan madaniyat markazi va Namvon madaniyat va san'at markazi hamkorligida tashkil etildi.

Unda "Bahor" milliy raqs ansambli va O'zbekiston davlat konservatoriyasi ijodiy jamoasi o'z konsert dasturlarini  Namvon va Degu shaharlari aholisi e'tiboriga taqdim etdi. 

O'zbekiston san'atkori, shuningdek, Namvon shahrida tashkil etilgan "2025-Chunxyang ovozi dunyoni ochadi" va Tegu shahrida "Kuchli Tegu" xalqaro musiqa festivallarda ham faol ishtirok etishdi. San'atkorlarimizning mazkur festivallardagi chiqishlari koreys xalqi va xorijiy qatnashchilarda yuqori taassurot qoldirdi.

Vakillarimiz o'zlarining betakror dasturlari, xususan, yuksak mahorat bilan ijro etilgan o'zbek milliy kuy-qo'shiqlari va raqslari orqali yurtimiz madaniyatini munosib targ'ib qilishdi.