OSLO, 8 avgust. /Dunyo" AA/. Norvegiyaning "Geopolitika" jurnalida "Markaziy Osiyoda mintaqaviy hamkorlikning yuksalishi: muloqotdan umumiy maqsad sari" sarlavhali maqola chop etildi, deb xabar beradi "Dunyo" AA muxbiri.

Unda Markaziy Osiyo davlatlari strategik harakatlar erkinligi va yaqinroq mintaqaviy hamjihatlik imkoniyatlarini mavhum ambitsiya sifatida emas, balki o'zlari duch kelayotgan umumiy chaqiriq va imkoniyatlarga amaliy javob sifatida faol o'rganayotgani ta'kidlangan.

"Markaziy Osiyo davlatlari mintaqaviy xavfsizlik, iqtisodiy integratsiya va madaniy almashinuv masalalarini hal etishning ko'p tomonlama mexanizmlarini taklif qiluvchi Shanxay hamkorlik tashkiloti va Turkiy davlatlar tashkiloti kabi tuzilmalar doirasida hamkorlik qiladi. Bundan tashqari, keyingi yillarda Markaziy Osiyo davlatlarining tashqi siyosati, ayniqsa, tashqi sheriklar bilan munosabatlarda yana-da yaqqol muvofiqlashtirish va mintaqaviy yondashuvni namoyon etmoqda. Bu Markaziy Osiyo va asosiy global o'yinchilar o'rtasida muloqot uchun ko'p tomonlama formatlarning paydo bo'lishida namoyon bo'lmoqda", – deyilgan maqolada.

Nashrda yozilganidek, har bir davlat o'z suvereniteti va tashqi siyosatdagi ustuvorliklarini saqlab qolgan bo'lsa-da, mintaqaviy birdamlik tobora murakkablashib borayotgan geosiyosiy muhitda ovoz va ta'sirni kuchaytirishi haqida tushuncha kuchaymoqda. Bu o'zgarish mintaqaviy o'ziga xoslikni shakllantirish bo'yicha kengroq ishlarga mos keladi va umumiy muammolarni birgalikda va xalqaro hamkorlar bilan hamkorlikda hal qilish eng yaxshisi degan pragmatik tushunchani aks ettiradi.

Muallif ta'kidiga ko'ra, O'zbekiston Afg'oniston bilan konstruktiv hamkorlikni rivojlantirishda yetakchi o'rin tutadi. O'zbekiston Afg'onistonga faqat xavfsizlikka tahdid sifatida qarash o'rniga, mintaqaviy rivojlanish bo'yicha hamkor sifatidagi salohiyatiga e'tiborini qaratdi.

Maqola xulosasida, "Ushbu hamkorlik ruhi davom etar ekan, Markaziy Osiyo beqaror geosiyosiy muhitda faolligi va barqarorligini mustahkamlashda davom etadi", – deb yozilgan.