ISLOMOBOD, 11-noyabr. /"Dunyo" AA/. Pokistonning yetakchi ommaviy axborot vositalari Toshkent–Islomobod o'rtasida yo'lga qo'yilgan ikkinchi to'g'ridan-to'g'ri aviaqatnovlarning ahamiyatini keng yoritmoqda, deb xabar beradi "Dunyo" AA muxbiri.

Jumladan, ushbu mamlakatning "Islamabad Post", "Diplomatic News Agency" (DNA), "Pakistan Today", "Pakistan in the World" va "DAWN" kabi nashrlarda O'zbekiston va Pokiston poytaxtlarini o'zaro bog'laydigan ikkinchi havo qatnovlarining ochilganiga bag'ishlangan turkum maqolalar e'lon qilindi.

Nashrlarda ma'lum qilinganidek, "Uzbekistan Airways" milliy aviakompaniyasi shu yil 28 oktyabr sanasidan boshlab O'zbekiston va Pokiston o'rtasida haftasiga jami to'rtta reysni amalga oshirishni boshladi.Pokiston ommaviy axborot vositalarining yozishicha, mamlakatlarimiz o'rtasidagi aviareyslar sonini oshirish qarori yo'lovchilarning yuqori talabi bilan bog'liq bo'lib, avvalgi Islomobod reyslari ko'pincha to'liq quvvatda amalga oshirilar va chiptalar bir necha kun oldin sotilib ketar edi.

"Toshkent-Islomobod-Toshkent" reyslari haftasiga ikki marta, har seshanba va shanba kunlari amalga oshiriladi. "Toshkent-Lahor-Toshkent" reyslari ham haftasiga ikki marta, har chorshanba va juma kunlari amalga oshiriladi. Ushbu kengayish bilan "Uzbekistan Airways" Markaziy va Janubiy Osiyo o'rtasidagi asosiy ko'prik sifatidagi rolini mustahkamlaydi va pokistonlik sayohatchilarga dunyo bo'ylab ko'proq tanlov, qulaylik va yo'nalishlarga ulanish imkonini beradi", – deyilgan maqolalarda

Qayd etilishicha, Toshkent orqali uchadigan yo'lovchilar Istanbul, Frankfurt, Parij, London, Nyu-York, Moskva, Dubay, Tokio, Seul, Kuala-Lumpur, Boku, Ostona, Batumi va boshqa ko'plab yirik global shaharlarga uzluksiz tranzit aloqalaridan foydalanishlari mumkin.

O'zbekiston va Pokiston Ipak yo'li va islom sivilizatsiyasi merosiga asoslangan ko'p asrlik tarixiy, madaniy va ma'naviy aloqalarga ega. Kengaytirilgan havo aloqalari ikki qardosh xalq o'rtasidagi turizm, savdo va odamlar o'rtasidagi almashinuvni yanada mustahkamlaydi.

Shuningdek, pokistonlik sayyohlar uchun O'zbekistonning afsonaviy Ipak yo'li kesib o'tgan shaharlari – Samarqand, Buxoro, Xiva va Qo'qonga oson borish imkoniyatini taqdim etadi. Ushbu qadim kentlar o'zining ajoyib islom me'morchiligi, bozorlari va umumiy madaniy merosi bilan mashhur.

Maqolalar xulosasida "Mazkur qatnovlar O'zbekiston-Pokiston munosabatlarida yangi sahifani boshlab, umumiy intilishlarni real hamkorlikka aylantiradi. Bu yo'nalishlar shunchaki parvozlardan ko'proq narsani anglatadi: ular oilalar, madaniyatlar va iqtisodiyotlarni chegaralar orqali bog'laydigan do'stlik ko'priklaridir", – deb yozgan Pokiston OAV.