QOZON, 2-iyul. /"Dunyo" AA/. Qozon shahrida Toshkent tibbiyot akademiyasi va Qozon davlat tibbiyot universiteti qo'shma ta'lim dasturining birinchi bitiruvchilariga diplom topshirish marosimi bo'lib o'tdi, deb xabar qilmoqda "Dunyo" AA muxbiri.

Ta'lim dasturini muvaffaqiyatli o'zlashtirgan va yakuniy attestatsiyadan o'tgan 26 nafar bitiruvchiga shifokor malakasini beruvchi oliy ma'lumot to'g'risidagi diplom Tatariston Davlat Kengashi binosida tantanali ravishda topshirildi. Bitiruvchilarni Tatariston Respublikasi rahbariyati nomidan Tatariston Davlat Kengashi va Tatariston Xalqlari Assambleyasi raisi Farid Muxametshin tabrikladi.

2017-yil oktabr oyida Toshkent davlat tibbiyot universiteti va Qozon davlat tibbiyot universiteti o'rtasida professor-o'qituvchilar, olimlar, mutaxassislar o'rtasida tajriba almashish, ilmiy-pedagogik kadrlarni tayyorlash, qayta tayyorlash va malakasini oshirish, qo'shma ilmiy-amaliy tadbirlarni tashkil etish bo'yicha hamkorlik to'g'risidagi bitim imzolangan edi.

Hujjatga ko'ra, 2019-yildan boshlab ikki mamlakat universitetlari o'rtasida davolash ishi mutaxassisligi bo'yicha ikki tomonlama diplom berish qo'shma ta'lim dasturi yo'lga qo'yilgan.

Ta'kidlash joizki, bu O'zbekiston va Rossiya oliy ta'lim muassasalari o'rtasida qo'shma ta'lim dasturi asosida tahsil olgan bo'lajak shifokorlarning dastlabki bitiruvchilaridir.