VARSHAVA, 30-aprel. /"Dunyo" AA/. Mamlakatimiz elchixonasi ko'magida joriy yilning 22-25-aprel kunlari O'zbekiston oliy ta'lim, fan va innovatsiyalar vaziri o'rinbosari Sarvarxon Buzrukxonovning Polshaga amaliy tashrifi tashkil etildi, deb xabar qilmoqda "Dunyo" AA muxbiri.

Tashrif doirasida Varshava texnika universitetida Polshada tahsil olayotgan o'zbekistonlik talabalar bilan uchrashuv o'tkazildi.

Ochiq muloqot ruhida o'tgan ushbu tadbir davomida talabalar o'zlarining ta'lim jarayoni, erishayotgan yutuqlari, kelajakdagi orzu-intilishlari hamda duch kelayotgan muammolari haqida so'zlab berishdi. Vazir o'rinbosari Sarvarxon Buzrukxonov talabalarni tinglab, ularga kerakli tavsiyalar berdi, elchixona bilan bog'liq masalalarni joyida hal etish bo'yicha choralar ko'rildi.

Shuningdek, muloqot doirasida Polshada faoliyat yuritayotgan, o'zining faolligi va bilimga chanqoqligi bilan ajralib turgan, ta'lim sohasida sezilarli yutuqlarga erishgan talabalar tashakkurnoma bilan taqdirlandilar.