TOSHKENT, 27-sentabr. /"Dunyo" AA/. Tashqi ishlar vaziri o'rinbosari Olimjon Abdullayev boshchiligidagi O'zbekiston delegatsiyasi Janubiy Koreyaga rasmiy safari doirasida Koreya Respublikasi tashqi ishlar vazirining o'rinbosari Jung Ki-xong bilan muzokaralar o'tkazdi, deb xabar bermoqda "Dunyo" AA muxbiri.

TIV ma'lumotiga ko'ra, muzokaralar davomida iqtisodiy hamkorlikni kengaytirish istiqbollari, O'zbekistondagi koreys diasporasini va Janubiy Koreyadagi O'zbekiston fuqarolarini qo'llab-quvvatlash, shuningdek, mehnat migratsiyasi masalalari muhokama qilindi. Ayni paytda migratsiya sohasida sheriklik to'g'risidagi bitim loyihasini idoralararo kelishish ishlari davom etmoqda.

Koreya Respublikasi Tashqi ishlar vazirligi ushbu hujjatni imzolashga ko'maklashishga va madaniy-gumanitar, iqtisodiy va mehnat migratsiyasi sohalarida hamkorlikni mustahkamlashga tayyor ekanligini tasdiqladi.