TOSHKENT, 15-noyabr. /"Dunyo" AA/. Yaponiya elchisi Hirata Kenji va O'zbekiston sog'liqni saqlash vaziri Asilbek Xudayarov Yaponiya hukumati tomonidan amalga oshirilayotgan 859 million iyena (taxminan 5,6 million AQSh dollari) miqdoridagi "Iqtisodiy va ijtimoiy rivojlanish dasturi" beg'araz yordami doirasida Almashinuv notalarini imzoladilar, deb xabar bermoqda "Dunyo" AA muxbiri.

Ushbu dastur doirasida Toshkent va O'zbekistonning boshqa hududlaridagi jami 17 ta davlat shifoxonalari Yaponiyada ishlab chiqarilgan mammografiya skrining uskunalari bilan jihozlanadi va butun mamlakat bo'ylab mammografiya skriningi xizmatlari kengaytiriladi. Ushbu loyiha ko'krak bezi saratonini erta tashxislashni osonlashtirishi va zamonaviy yapon texnologiyalarini joriy etish orqali mamlakatning sog'liqni saqlash tizimini mustahkamlashi kutilmoqda.

2022-yil dekabr oyida Tokioda bo'lib o'tgan "Markaziy Osiyo+Yaponiya" Muloqoti doirasidagi Tashqi ishlar vazirlarining 9-yig'ilishida erkin va ochiq Markaziy Osiyoda barqaror rivojlanishga erishish maqsadida, Yaponiya "Insonlarga sarmoya kiritish" va "O'sish sifati"ga alohida urg'u beradigan yangi model asosida hamkorlikni rivojlantirishga qaror qildi. Ushbu loyiha "Insonlarga sarmoya kiritish" ga hissa qo'shadi.

Yaponiya hukumati O'zbekistonda tibbiy xizmat sifatini oshirishga qaratilgan hamkorlikni rivojlantirishda davom etadi.