KOBUL, 19-avgust. /"Dunyo" AA/. Afg'onistonning "TOLO news" axborot agentligi telekanalida O'zbekiston energetika vaziri Jo'rabek Mirzamahmudov boshchiligidagi mamlakatimiz delegatsiyasining ushbu mamlakatga tashrifiga bag'ishlangan dastur namoyish etildi, deb xabar qilmoqda "Dunyo" AA muxbiri.

Teledasturda  safar davomida O'zbekiston va Afg'oniston o'rtasida to'rtta yirik energetika loyihasini amalga oshirish bo'yicha bitim imzolangani xabar qilingan.

"Bugun biz imzolayotgan ushbu shartnoma O'zbekiston Prezidentining bevosita qo'llab-quvvatlashi natijasidir. Bu loyiha Afg'oniston sanoatining rivojlanishida muhim rol o'ynaydi", – deya qayd etgan O'zbekiston energetika vaziri o'z intervyusida.

Ta'kidlanishicha, mazkur loyihalarning amalga oshirilishi natijasida O'zbekistondan Afg'onistonga 800 MVtdan 1000 MVtgacha elektr energiyasini yetkazib berish imkoni yaratiladi. Bu esa, o'z navbatida, mamlakatda elektr energiyasi ta'minoti taqchilligini bartaraf etishga yordam beradi. 

"Shuningdek, mazkur loyihalar nafaqat mamlakatni elektr energiya bilan ta'minlaydi, balki Afg'onistonni ijtimoiy-iqtisodiy tiklanishiga yordam beradi", – deydi telekanal muxbiri.