TOSHKENT, 23-avgust. /"Dunyo" AA/. Ozarbayjon Prezidenti Ilhom Aliyevning O'zbekistonga davlat tashrifi arafasida Toshkent shahrida qo'shma biznes-forumi bo'lib o'tdi, deb xabar bermoqda "Dunyo" AA muxbiri.

Investitsiyalar, sanoat va savdo vazirligi ma'lumotiga ko'ra, tadbirda O'zbekiston delegatsiyasiga investitsiyalar, sanoat va savdo vaziri Laziz Kudratov, Ozarbayjon delegatsiyasiga Ozarbayjon Iqtisodiyot vaziri Mikail Jabborov boshchilik qildi.

Forumda vazirlik va idoralar, tarmoq birlashmalari rahbarlari, hududlar hokimliklari rahbarlari hamda ikki mamlakat ishbilarmon doiralarining 300 dan ortiq vakillari ishtirok etdi.

Laziz Kudratov tadbir ishtirokchilariga murojaat qilar ekan, Ozarbayjonning ko'p sonli ishbilarmon delegatsiyasiga tashrifiga minnatdorlik bildirib, ikki davlat rahbarlarining oqilona siyosati tufayli ikki tomonlama hamkorlik strategik xususiyat kasb etib, sifat jihatidan yangi bosqichga chiqqanini alohida ta'kidladi.

Ko'p qirrali O'zbekiston-Ozarbayjon hamkorligining jadal rivojlanayotgani qayd etildi. Keyingi 5 yilda o'zaro tovar ayirboshlash hajmi 3 barobar, joriy yil boshidan buyon esa yana 20 foizga oshdi. Ikki davlat rahbarlari tomonidan qo'yilgan vazifa – yaqin kelajakda tovar ayirboshlash hajmini 1 milliard dollarga yetkazish bo'yicha faol ishlar olib borilmoqda.

Iqtisodiyotning eng ustuvor tarmoqlari — energetika va shaharsozlikdan tortib mashinasozlik, to'qimachilik va ipakchilik, qishloq xo'jaligi kabi sohalardagi sarmoyaviy hamkorlik ko'lami kengaymoqda. O'zbekistonda "Pasha Holding", "Matanat", "Sarda Group", "Sokar" kabi eng yirik Ozarbayjon kompaniyalari muvaffaqiyatli faoliyat yuritmoqda. O'z navbatida, O'zbekistonning "Global Textile", "Azsilk", "Businesstex" kabi kompaniyalar Ozarbayjon hududlarida faoliyat yuritmoqda.

Investitsiyaviy hamkorlikni kengaytirishning harakatlantiruvchi kuchi bo'lgan Qo'shma investitsiya kompaniyasi ishga tushirildi. Yengil va oziq-ovqat sanoati, yashil energetika, sog'liqni saqlash va boshqa sohalarda aniq loyihalar portfeli shakllantirildi.

Shu bilan birga, import o'rnini bosish va hamkorlik dasturlarini amalga oshirish, tovarlarni elektron platformalarda joylashtirish, savdo uylari, ko'rgazma zallari va milliy pavilyonlar ochish, qurilish materiallari yetkazib berish hajmini oshirish, talabga ega bo'lgan mahsulotlarni samarali rag'batlantirish uchun o'zaro asosda tarmoq birlashmalari vakillari uchun lavozimlar tashkil etish kabi savdo-iqtisodiy va sarmoyaviy hamkorlikni rivojlantirishning istiqbolli yo'nalishlar qayd etildi.

Sanoat kooperatsiyasini chuqurlashtirish, jumladan, to'qimachilik va ipak ishlab chiqarish, qurilish materiallari, oziq-ovqat va tog'-kon sanoati, shaharsozlik, infratuzilma va zamonaviy turar-joy, savdo tarmoqlarini rivojlantirish bo'yicha yangi yirik loyihalarni amalga oshirish orqali katta imkoniyatlar mavjudligi ta'kidlandi.

Shuningdek, tog'-kon sanoati, energetika va neft-gaz sanoatida qo'shma loyihalarni amalga oshirish, "yashil" energiya ishlab chiqarish va eksport qilish, qishloq xo'jaligida hamkorlikni kengaytirish istiqbolli yo'nalishlar sifatida belgilandi.

O'z navbatida, Ozarbayjon Iqtisodiyot vaziri Mikail Jabborov samimiy qabul uchun O'zbekiston tomoniga minnatdorlik bildirdi. Ma'ruzachi O'zbekistonda yaratilgan sarmoyaviy muhit va tadbirkorlikni har tomonlama rivojlantirish imkoniyatlarini yuksak baholab, uzoq muddatli hamkorlikka ishonch bilan tayangan holda Ozarbayjon biznesini ikkilanmasdan O'zbekistonga sarmoya kiritishga taklif qildi.

Tadbir doirasida B2B va G2B muzokaralari bo'lib o'tdi. Unda o'zbekistonlik va ozarbayjonlik tadbirkorlar kelgusida qo'shma investitsiya loyihalari va savdo shartnomalarini muhokama qilish imkoniyatiga ega bo'lishdi.

Forum yakunlari bo'yicha infratuzilmani rivojlantirish va shahar qurilishi, yangi logistika markazlari, ta'lim obyektlari, hamkor mamlakatlarda sanoat birlashmalarining vakolatxonalarini qurish bo'yicha ikki tomonlama hujjatlar almashish marosimi bo'lib o'tdi, shuningdek, hamkorlikni rivojlantirish bo'yicha aniq vazifalar va ularni amalga oshirish muddatlari aks etgan qo'shma "Yo'l xaritasi" qabul qilindi.