SAMARQAND, 3-noyabr. /"Dunyo" AA/. Samarqand shahrida bo'lib o'tayotgan YUNESKO Bosh konferensiyasining 43-sessiyasi doirasida O'zbekiston oliy ta'lim, fan va innovatsiyalar vaziri Qo'ng'irotbay Sharipov Shvetsiya ta'lim bo'yicha davlat kotibi Oskar Voglund Syoderstryom bilan uchrashdi, deb xabar bermoqda "Dunyo" AA muxbiri.

Tomonlar fan va ta'lim sohasidagi ikki tomonlama hamkorlik masalalarini muhokama qilib, qo'shma dastur va loyihalarni amalga oshirish istiqbollariga alohida e'tibor qaratdilar.

Uchrashuvda ikki mamlakatning oliy ta'lim muassasalari o'rtasidagi aloqalar rivojlanishining ijobiy dinamikasi, ayniqsa, innovatsiyalarni joriy etish va bilimlar almashinuvi sohasida hali foydalanilmagan imkoniyatlar mavjudligi ta'kidlandi.

Shuni ta'kidlash kerakki, so'nggi bir necha yil davomida Shvetsiya ilm-fan va innovatsiyalar sohasida global yetakchilardan biri bo'lib qolmoqda. "Global innovatsion indeks-2025" reytingida Skandinaviya mamlakati avvalgi yillardagidek Shveysariyadan keyin ikkinchi o'rinni egalladi.