TOSHKENT, 17-iyun. /"Dunyo" AA/. Bugun Vengriya poytaxti Budapesht shahrida o'tayotgan dzyudo bo'yicha Jahon chempionatining beshinchi kun bellashuvlari bo'lib o'tadi, deb xabar qilmoqda "Dunyo" AA muxbiri.

Milliy Olimpiya qo'mitasi ma'lumotiga ko'ra, unda erkaklar -90 kg, ayollar -70 kg vazn toifalarida medallar uchun kurash olib boradi. Kun davomida O'zbekiston terma jamoasining 3 nafar a'zosi ishtirok etadi.

Jumladan, -90 kg vaznda Shahzodxo'ja Sharipov Norvegiya vakili Kornelius Eylertsenga, -90 kg vaznda Nurbek Murtazoyev mavrikiylik sportchi Remi Feullega, -70 kg vaznda Xurshida Razzoqberdiyeva Xitoy Taypeyi vakilasi Yu-Jing Liaoga qarshi bahs olib boradi.

Shu kungacha o'tgan bellashuvlarda hamyurtlarimizdan Shukurjon Aminova (-57 kg) hamda Arslonbek Tojiyev (-81 kg) bronza medali uchun kurashish bosqichigacha yetib kelishgan. Ammo ushbu bahslarda raqiblar ustunlik qilib, har ikki dzyudochimiz beshinchi natija bilan musobaqani yakunladi.