MASKAT, 19-iyun. /"Dunyo" AA/. O'zbekiston elchisi Abdusalom Xatamov O'mondagi yirik turistik kompaniyalardan biri – "E-Travel & Tours" bosh menejeri Ejaz Kazi bilan uchrashdi, deb xabar qilmoqda "Dunyo" AA muxbiri.

O'mon tomoniga mamlakatimizning turizm salohiyati, mazkur sohada yaratilgan infratuzilma, Ko'rfaz arab davlatlari fuqarolari, xususan o'monliklar uchun O'zbekistonga 30 kunlik vizasiz kirish tartibi joriy etilgani hamda yaqin kunlarda Maskat-Toshkent yo'nalishi bo'yicha yo'lga qo'yilishi rejalashtirilgan to'g'ridan-to'g'ri aviaqatnovlar haqida so'zlab berildi.

"E-Travel & Tours" kompaniyasi bosh menejeri shu yilning iyul oyida Maskat shahrida O'zbekiston elchixonasi va Turizm qo'mitasi bilan hamkorlikda o'tkazilishi rejalashtirilgan sayyohlik taqdimotini yuqori darajada tashkil etishda yaqindan yordam berishga tayyorligini bildirdi.

"Shuningdek, O'monning yirik turkompaniyalari va taniqli blogerlaridan iborat delegatsiyaning O'zbekistonga media-turini tashkil etish rejamiz ham bor", – dedi Ejaz Kazi.