LONDON, 13-sentabr. /"Dunyo" AA/. London shahrida o'tayotgan "World Halal Food Festival" doirasida o'zbek milliy taomlarini tayyorlash bo'yicha master-klass tashkil etildi, deb xabar qilmoqda "Dunyo" AA muxbiri.

Master-klass mamlakatimiz elchixonasi, O'zbekistonning Buyuk Britaniyadagi turizm elchisi Sofi Ibbotson va "Oshpaz" — o'zbek milliy taomlari brendi bilan hamkorlikda uyushtirildi.

Festival ishtirokchilari va mehmonlariga o'zbek oshxonasining asosiy taomlari – palov, somsa, manti hamda turli xil shirinliklar taqdim etildi.

Tadbir davomida mehmonlar nafaqat taomlardan tatib ko'rish, balki ularni tayyorlanish jarayonida ishtirok etdilar. Master-klass o'zbek xalqiga xos mehmondo'stlik va yuksak kulinar an'analarni yorqin tarzda namoyish etish imkonini berdi.

Festival mehmonlari o'zbek oshxonasiga katta qiziqish bildirib, o'zbek milliy taomlariga yuqori baho berdilar. Tadbir O'zbekistonning boy madaniy merosi va gastronomik turizmini targ'ib etishda ham muhim ahamiyat kasb etdi.