LONDON, 27-iyun. /"Dunyo" AA/. O'zbekiston elchisi Ravshan Usmanov Britaniyaning "International College at Robert Gordon University" (ICRGU) direktori Alister Beyker bilan uchrashuv o'tkazdi, deb xabar qilmoqda "Dunyo" AA muxbiri.

Muloqot chog'ida O'zbekiston oliy ta'lim muassasalari bilan ikki tomonlama hamkorlikni yo'lga qo'yish istiqbollari ko'rib chiqildi.

Alister Beyker O'zbekistonda oliy ta'lim sohasida amalga oshirilayotgan yangilanish va o'zgarishlarni yuksak baholadi. Iqtidorli yoshlarning zamonaviy bilimlarni egallashi uchun keng imkoniyatlarning taqdim etilishi, jumladan "El-yurt umidi" jamg'armasining ta'sis etilganligi alohida ta'kidlandi.

Shuningdek, "ICRGU" direktori "ICRGU" O'zbekiston universitetlari bilan o'zaro manfaatli hamkorlikni yo'lga qo'yishga tayyorligini bildirdi.

"International College at Robert Gordon University" – bu Shotlandiyaning Aberdin shahrida joylashgan Robert Gordon University (RGU)ning oliy ta'lim o'quv dasturlari va yo'nalishlariga tayyorlovchi muassasa hisoblanadi.

"ICRGU" farmatsevtika, sog'liqni saqlash, muhandislik va boshqa oliy ta'lim yo'nalishlarida (Business, Engineering, Computing, Architecture, Art & Design) o'quv dasturlarini davom ettirishda ko'nikma hosil qilish uchun ko'maklashadi.