LONDON, 25-avgust. /"Dunyo" AA/. Mamlakatimiz elchixonasida Buyuk Britaniyaning "Hudson Sandler" kompaniyasining Markaziy Osiyo bo'yicha mas'ul vakillari Charli Jek va Kristina Gaysina bilan uchrashuv bo'lib o'tdi, deb xabar qilmoqda "Dunyo" AA muxbiri.

Muzokaralar chog'ida O'zbekiston-Britaniya ikki tomonlama kun tartibini izchil kengaytirish maqsadida yuqori darajadagi tadbirlarni tashkil etish masalalari muhokama qilindi.

Xususan, "G2B" va "B2B" formatidagi hamkorlikni kuchaytirish, Britaniyaning yirik kompaniya va brendlari bilan yaqin aloqalarni yo'lga qo'yish muhim ahamiyatga ega ekani ta'kidlandi. Shuningdek, O'zbekiston kompaniyalarining xalqaro kapital bozorlariga chiqishiga tizimli ko'mak berish ustuvor vazifa ekanligi qayd etildi.

Uchrashuv yakunida kelgusida rejalashtirilgan tadbirlarni hukumat va biznes doiralarni jalb etgan holda yuqori darajada tashkil etish borasidagi sa'y-harakatlarni muvofiqlashtirishga kelishib olindi.

1986-yilda tashkil etilgan "Hudson Sandler" kompaniyasi strategik kommunikatsiyalar va konsalting xizmatlarini ko'rsatadi. Shuningdek, mijozlariga korporativ boshqaruv, yirik kompaniya va brendlar bilan kommunikatsiyalar o'rnatishga qaratilgan xizmatlarni taklif etadi.