ВАШИНГТОН, 15 сентябрь. /"Дунё" АА/. Америка давлатлари ташкилотининг тарихий қароргоҳида илк бор Ўзбекистон мустақиллигининг 34 йиллигига бағишланган тантанали қабул маросими бўлиб ўтди, деб хабар қилмоқда "Дунё" АА мухбири.

Унда Оқ уй, Конгресс, Давлат департаменти, Савдо вазирлиги, Пентагон, АҚШ Савдо вакили идораси, DFC корпорацияси расмийлари, шунингдек, экспертлар, бизнес, жамоатчилик, маданият, дипломатик корпус ва ўзбек диаспораси вакиллари иштирок этди.

Тадбир доирасида таниқли ўзбек санъат усталари, жумладан Маданият вазирлиги қошидаги "Халқлар дўстлиги" ансамбли иштирокидаги концерт дастури, Ўзбекистон маданий мероси экспонатлари кўргазмаси, миллий таомлар тақдимоти бўлиб ўтди.

Қабулда фахрий меҳмон сифатида АҚШ Давлат котибининг Жанубий ва Марказий Осиё бюроси бўйича ёрдамчиси вазифасини бажарувчи Бетани Моррисон иштирок этди.

Бетани Моррисон ўз нутқида, Ўзбекистон тарихидаги энг муҳим кунни нишонлашда иштирок этиш таклифи учун миннатдорлик билдирди.

"Ўтган ҳафтада Президент Дональд Трамп ва Президент Шавкат Мирзиёев ўртасида телефон орқали мулоқот бўлиб ўтди. Бу чақириқ алоқаларимиз чуқурлашиб бораётганининг тасдиғи ва Ўзбекистон Президентининг 2018 йилда Оқ уйга ташрифи чоғида ўрнатилган муносабатларнинг мантиқий давоми бўлди. Суҳбат давомида Қўшма Штатлар ва Ўзбекистон муҳим йўналишларда ҳамкорликни мустаҳкамлаш борасида эришилаётган муҳим ютуқлар ўз ифодасини топди. Мен Ўзбекистон терма жамоасини 2026 йилги жаҳон чемпионатига тарихий йўлланма олгани билан табриклайман ва яқин орада Ўзбекистонга ташриф буюришни режалаштиряпман", – деди у.

Америка-Ўзбекистон Савдо палатаси ижрочи директори Елена Сон икки давлат ўртасидаги алоқалар жадаллашганини айтиб ўтди. "Раҳбарларимиз ўртасида яқинда бўлиб ўтган телефон орқали суҳбатда аниқ устувор йўналишлар, жумладан, ишбилармонлик алоқаларини кенгайтириш ҳақида сўз борди. 2018 йилда Палатамиз кўмагида Америка корпорациялари ва Ўзбекистон ҳукумати ўртасида умумий қиймати 4 миллиард долларлик шартномалар имзоланди. Ишончимиз комилки, ўсиш салоҳияти бугунги кунда ҳам сақланиб қолмоқда", – деди Елена Сон.

"Project C.U.R.E" фонди директори Аюб Аюби фонди Самарқанд вилоятига 12 миллион долларлик инсонпарварлик ёрдамини жўнатиш учун барча тайёргарлик ишлари якунланганини маълум қилди. Тиббий асбоб-ускуналар жорий йилнинг октябрь ойида етказиб берилиши кутилмоқда.

АҚШ Конгресси Вакиллар Палатасининг Ташқи ишлар бўйича қўмитаси маслаҳатчиси Бэау Шоу Конгресснинг Ўзбекистонга қизиқиши ортиб бораётганини таъкидлади. "Тадбирда Конгресснинг 40 дан ортиқ ходими иштирок этди, шунингдек, америкалик қонунчиларнинг Тошкентга ташрифи режалари ҳам муҳокама қилинмоқда", – қайд этди у.

Санта-Круздаги Калифорния университети профессори Таня Мерчант ва "Марказий Осиё" ансамблининг чиқишлари иштирокчиларга катта таассурот қолдирди. Тадбир давомида унга Ўзбекистоннинг АҚШдаги маданият элчиси этиб тайинланганлик тўғрисидаги сертификат топширилди. Таня Мерчант ўзбек ва инглиз тилларида сўзлаган нутқида 20 йилдан ортиқ вақт давомида ўзбек мусиқаси ва тилини ўрганиб келаётганини алоҳида таъкидлаб, Ўзбекистон маданияти элчиси этиб тайинлангани учун миннатдорлик билдирди.