ПЕКИН, 29 август. /"Дунё" АА/. Пекин халқаро мулоқот клуби бош котиби Хань Хуа (Хитой) "Дунё" АА учун интервьюсида Ўзбекистон давлат мустақиллигининг 34 йиллиги муносабати билан халқимизга ўзининг байрам табрикларини изҳор қилди:

– Аввало, Ўзбекистон давлат мустақиллигининг 34 йиллиги билан самимий табриклайман. Ўтган давр мобайнида Ўзбекистон давлат қурилиши, иқтисодиётни модернизация қилиш, халқаро майдонда мустақил ўринни эгаллаш борасида улкан ютуқларга эришди. Ушбу сана нафақат ўтган ютуқлар байрами, балки келажакка ишонч билан қараш учун муҳим дақиқадир.

Президент Шавкат Мирзиёев раҳнамолигида Ўзбекистонда бир қатор жуда муҳим ислоҳотлар амалга оширилмоқда. Бу ислоҳотлар улкан ва кенг қамровли бўлиб, иқтисодиётни либераллаштириш, инвестиция муҳитини яхшилаш, инфратузилмани модернизация қилиш, ижтимоий фаровонлик, таълим ва бошқарувни ўз ичига олади.

Эътиборлиси, бу ислоҳот дастури ҳам прагматик, ҳам узоқ муддатли бўлиб, Ўзбекистоннинг иқтисодий салоҳиятини очиб беради ва мамлакатнинг ташқи дунёга очилишини чуқурлаштиради. Бу ислоҳотлар нафақат Ўзбекистоннинг ҳамкор сифатидаги жозибадорлигини оширибгина қолмай, балки бутун Марказий Осиё минтақасига янги куч-ғайрат бағишламоқда.

Хитой-Ўзбекистон муносабатлари сўнгги йилларда жадал ривожланиб, мазмуни тобора чуқурлашиб бормоқда. Хитой доимо Ўзбекистонга Марказий Осиёдаги муҳим стратегик шерик сифатида қараган. Икки томонлама ҳамкорлигимиз савдо, сармоя, инфратузилма, энергетика ва одамлар ўртасидаги алмашинувни ўз ичига олади. Хитой компаниялари Ўзбекистондаги нафақат инвесторлар, балки узоқ муддатли ҳамкорлар бўлиб, маҳаллий тараққиёт ва янги иш ўринлари яратишга фаол ҳисса қўшмоқда.

Ўзбекистон, шунингдек, минтақавий боғлиқлик ташаббусларини, жумладан, "Бир макон, бир йўл" ташаббусини фаол қўллаб-қувватлайди. Шу маънода муносабатларимиз нафақат мамлакатларимизга фойда келтиради, балки минтақавий барқарорлик ва фаровонликни биргаликда рағбатлантиришга ҳам хизмат қилади.