АНҚАРА, 5 август. / "Дунё" АА/. Мамлакатимиз мустақиллигининг 34 йиллик тантаналари арафасида Туркияда Ўзбекистон маданиятини тарғиб этишга қаратилган бир қатор тадбирлар ташкил этилди, деб хабар қилмоқда "Дунё" АА мухбири.

Жумладан, Халқаро Туркий маданият ташкилоти – Турксой, ҳамда Анқара шаҳри туманлари ҳокимликлари билан ҳамкорликда "Туркий дунё фестивали" ўтказилди.

Фестивалда Тошкент вилояти Маданият бош бошқармаси ижодий жамоалари вакиллари фаол иштирок этди. Ўзбекистон жамоаси ижросидаги миллий куй-қўшиқларимиз, "Лазги", "Дилҳирож" ва "Андижонча" каби рақсларимиз ташриф буюрганларда катта қизиқиш уйғотди.

Тадбирда сўз олганлар туркий халқлар ўртасидаги тарихий яқинлик, сўнгги йилларда изчил ривожланиб бораётган маданий-гуманитар соҳалардаги ҳамкорлик алоқаларига алоҳида тўхталиб ўтдилар.

Шунингдек, "Пойтахт маданий учрашувлари" номли яна бир тадбир Анқара шаҳар ҳокимияти мезбонлигида ташкил этилди.

Унда Ўзбекистондан келган ёш ижодкорлар – Давлат миллий рақс ва хореография олий мактаби талабалари иштирок этди. Балет спектаклларидан парчалар, миллий ва жаҳон халқлари рақслари намуналарини ижро этган ёш ўзбек санъаткорларининг чиқишлари томошабинларнинг улкан эътирофига сазовор бўлди.