АНТАЛЬЯ, 31 август. /"Дунё" АА/. Ўзбекистоннинг Антальядаги фахрий консули Бариш Гёкче "Дунё" АА учун интервьюсида Ўзбекистон давлат мустақиллигининг 34 йиллиги муносабати билан мамлакатимиз халқига ўзининг байрам табрикларини йўллади:

 – Ўзбекистон 1991 йил 31 августда ўз мустақиллигини эълон қилди ва 1 сентябрни мустақиллик куни ўлароқ белгилади. Ҳар йили ушбу сана Ўзбекистонда катта кўтаринкилик билан нишонланади. Жорий йил 10 июль куни Ўзбекистон Президентининг "Ўзбекистон Республикаси давлат мустақиллигининг ўттиз тўрт йиллик байрамига тайёргарлик кўриш ва уни ўтказиш тўғрисида"ги қарори қабул қилинди. Қарор ижроси доирасида 34 йиллик мустақиллик байрами Янги Ўзбекистоннинг ривожланиш даражасига, жаҳон майдонидаги обрў-эътиборига муносиб тарзда юксак савияда нишонланяпти.

Мустақилликнинг 34 йиллигига бағишланган байрам тадбирлари "Ватан учун, миллат учун, халқ учун!" деган эзгу ғоя остида кенг тантана қилинмоқда. Ўзбекистон истиқлолга эришган кун муносабати билан Туркияда ҳам бир қатор маънавий-маърифий тадбирлар ташкил этилаётир. Уларда Ўзбекистондан санъат усталари иштирок этаяпти. Жумладан, жорий август ойи бошида Тошкент вилояти Маданият бошқармаси қошидаги мусиқа жамоаси вакиллари Анқара ва Караман шаҳарларида ўтказилган тадбирларда иштирок этишди. Улар ўз чиқишлари орқали ўзбек маданиятини кенг тарғиб қилдилар.

Фурсатдан фойдаланиб, барча ўзбек биродар ва опа-сингилларимизни Ўзбекистон учун энг улуғ ва энг азиз байрам – Мустақиллик куни билан чин қалбимдан табриклайман.

Ўзбекистон Мустақиллиги бардавом бўлсин! Яшасин ўзбек-турк қардошлиги!