ДЮССЕЛЬДОРФ, 13 октябрь. /“Дунё” АА/. Ўзбекистоннинг Франкфурт-Майн шаҳридаги Бош консулхонаси кўмагида юртимизнинг “AKFA” компанияси Германиянинг Дюссельдорф шаҳрида бўлиб ўтган алюминий саноатининг нуфузли “ALUMINIUM 2026” халқаро кўргазмасида ўз маҳсулотлари билан иштирок этди, деб хабар бермоқда “Дунё” АА мухбири.

Компания стендида хорижий меҳмонлар ва соҳа мутахассисларига Ўзбекистонда ишлаб чиқарилаётган юқори сифатли маҳсулотлар, шунингдек, маҳаллий саноатнинг алюминий буюмларини чиқариш бўйича улкан салоҳияти кенг таништирилди.

Кўргазма доирасида “AKFA” вакиллари етакчи хорижий компаниялар раҳбарлари билан қатор музокаралар ўтказдилар. Учрашувларда истиқболли бизнес ҳамкорликни йўлга қўйиш, етказиб бериш географиясини кенгайтириш ва янги шериклик алоқаларини ўрнатиш масалалари муҳокама қилинди.

Қайд этиш жоизки, “ALUMINIUM” халқаро ихтисослаштирилган кўргазмаси дунёнинг алюминий ишлаб чиқарувчилари, қайта ишловчилари, ускуна ва технологиялар етказиб берувчилари ҳамда мазкур хомашёдан фойдаланувчи саноат тармоқлари вакилларини ўзида бирлаштиради. Мазкур нуфузли анжуман турли мамлакатлардан 800 дан ортиқ экспонент ва ҳамкорларни ҳамда 21 мингдан зиёд профессионал ташриф буюрувчини қамраб олади.

“AKFA” компаниясининг мазкур халқаро тадбирда иштирок этиши корхонанинг экспорт салоҳиятини янада кенгайтириш, унинг ташқи бозорлардаги мавқеини мустаҳкамлаш ҳамда “Made in Uzbekistan” бренди остидаги маҳсулотларни жаҳон аренасида фаол тарғиб этишга хизмат қилади.