ВАШИНГТОН-ТЕҲРОН, 15 июль. /“Дунё” АА/. АҚШ Президенти Дональд Трампнинг маълум қилишича, агар Теҳрон музокараларни қайта бошлашга рози бўлмаса, Вашингтон келаси ҳафтадаёқ Эрон электр станциялари ва кўприкларига зарба бериши мумкин, деб хабар бермоқда “Дунё” АА мухбири.

Бу ҳақда президент Оқ уйдаги ситуацион хонада маъмурият ва ҳарбий раҳбариятнинг асосий вакиллари билан АҚШнинг Эронга нисбатан кейинги стратегияси муҳокама қилинган йиғилишдан сўнг “Fox News” телеканалига берган интервьюсида айтиб ўтди. Музокаралар Эрон томонидан берилаётган жавоб зарбалари ва Ҳўрмуз бўғози атрофидаги қарама-қаршиликлар фонида ўтказилди.

“Келаси ҳафта улар учун аҳвол жуда ёмон бўлади. Энди навбат электр станциялари ва кўприкларга келди. Уларнинг барча электр станцияларини йўқ қиламиз. Агар улар музокаралар столига ўтирмаса, биз уларнинг барча кўприкларини яксон қиламиз”, – деди Дональд Трамп.

Унинг сўзларига кўра, Америка вакиллари кеча тунда Эрон томонига ультиматум шаклидаги огоҳлантиришни етказган.

“Яхшиси, келишув тузинг, акс ҳолда сизда ҳеч нарса қолмайди”, – деди АҚШ Президенти ва ҳарбий операцияни давом эттириш бўйича якуний қарор ўзида қолишини қўшимча қилди: “Мен бас, демагунимча операция давом этади”.

Деярли бир вақтнинг ўзида АҚШ Қуролли Кучлари Марказий қўмондонлиги (CENTCOM) Эронга қарши зарбаларнинг янги босқичи бошланганини эълон қилди. Қўмондонлик баёнотида айтилишича, операция Эроннинг Ҳўрмуз бўғозидаги тижорат кемаларига ҳужум қилиш учун фойдаланадиган имкониятларини янада заифлаштиришга қаратилган.

АҚШ Ҳарбий-денгиз кучларининг Яқин Шарқдаги қўмондони адмирал Бред Купернинг таъкидлашича, Эрон фуқаролик кемаларига атайлаб ҳужум қилган, бунинг оқибатида тижорат кемалари экипажининг ўнга яқин аъзоси ҳалок бўлган, яраланган ёки бедарак йўқолган.

Шу билан бирга, Эрон Баҳрайн, Иордания ва Қувайтдаги Америка ҳарбий объектларига зарбалар берилганини маълум қилди. Ислом инқилоби посбонлари корпуси АҚШнинг бошқарув, моддий-техник таъминот объектлари ва ҳарбий инфратузилмасига ҳужум қилганини билдирди ҳамда Ҳўрмуз бўғози Америка ёвузлигига чек қўйилмагунча ёпиқ қолишидан огоҳлантирди.

Ўз навбатида, Эрон ташқи ишлар вазири ўринбосари Козим Ғарибободий Вашингтоннинг Эрон портларини денгиз орқали қамал қилишни қайта тиклаши аввал эришилган келишувларни амалда йўққа чиқарганини айтди. Унинг сўзларига кўра, Теҳрон ҳарбий ва иқтисодий босим остида музокараларга қайтмайди.

Аввалроқ, Дональд Трамп Ҳўрмуз бўғозидан ўтаётган ҳар бир кемадан 20 фоизлик йиғим ундирилишини эълон қилган эди. Бироқ кейинчалик у ўз таклифидан воз кечди. Унинг айтишича, Кўрфаз мамлакатлари раҳбарлари билан музокаралардан сўнг ушбу ташаббусни кенг кўламли савдо ва сармоявий битимлар билан алмаштиришга қарор қилган. Шу билан бирга, Президент АҚШнинг Эрон портларини қамал қилиши ўз кучида қолишини тасдиқлади.