ВАШИНГТОН-ТЕҲРОН, 11 июль. /“Дунё” АА/. АҚШ Президенти Дональд Трамп Вашингтон ва Теҳрон музокараларни давом эттиришга келишиб олганини маълум қилди. Бироқ у томонлар ўртасида илгари амал қилган ўт очишни тўхтатиш тартиби энди кучда эмаслигини алоҳида таъкидлади, деб хабар бермоқда “Дунё” АА мухбири.

Ушбу баёнот минтақада бир ҳафта давом этган тўқнашувлардан сўнг АҚШ ва Эрон ўртасидаги кескинликнинг янги тўлқини фонида янгради. Ҳужумлар оқибатида Ҳўрмуз бўғозида Қатар ва Саудия Арабистонига тегишли тижорат кемаларига шикаст етказилган эди. Бунга жавобан АҚШ Эрон объектларига зарбалар берди, Эрон эса Кўрфаз мамлакатларидаги АҚШ ҳарбий объектларига ҳужум уюштирди.

“Эрон Ислом Республикаси биздан музокараларни давом эттиришни сўради. Биз рози бўлдик, аммо АҚШ аниқ шарт қўйди: ўт очишни тўхтатиш тартиби якунланди”, — деб ёзди Президент ўзининг “Truth Social” ижтимоий тармоғидаги саҳифасида.

Эрон томони эса музокаралар бўйича АҚШга мурожаат қилмаганини даъво қилди. Шу билан бирга, Теҳрон кескинликни камайтириш ва Ҳўрмуз бўғозидаги вазиятни муҳокама қилиш учун ташриф буюрган қатарлик воситачини қабул қилишга рози бўлди.

Музокараларнинг асосий масалаларидан бири — можаро бошлангунга қадар жаҳон нефть етказиб бериш ҳажмининг қарийб бешдан бир қисми ўтган Ҳўрмуз бўғози орқали кемалар қатнови хавфсизлигини таъминлаш бўлди. Вашингтон Эрондан кемаларга ҳужум қилишни тўхтатишни ва ҳеч қандай чекловлар ҳамда божларсиз эркин ўтишни таъминлашни талаб қилди. Теҳрон эса кемалар Эрон томонидан маъқулланган йўналишлар бўйлаб ҳаракатланиши кераклигини талаб этмоқда.

Дональд Трамп, шунингдек, АҚШ қуролли кучлари унинг ҳаётига суиқасд уюштиришга уриниш содир бўлган тақдирда Эронга кенг кўламли зарбалар беришга шайлигини билдирди.

“Мен анчадан бери биринчи рақамли нишон бўлиб келяпман. Мен шундай йўриқнома қолдирдим: агар менга бирор нарса бўлса, уларни илгари ҳеч қачон кузатилмаган даражада бомбалаш керак”, — деди у “New York Post” газетасига берган интервьюсида.

Бундан олдин АҚШ ОАВ Исроил гўёки Вашингтонга Эрон томонидан Дональд Трампга суиқасд уюштириш режалаштирилаётгани ҳақида разведка маълумотларини тақдим этгани тўғрисида хабар тарқатган эди. АҚШ Президентининг ўзи бу хабарларни рад этиб, Исроил унга бундай маълумот бермаганини маълум қилди.