ВАШИНГТОН–ТЕҲРОН, 8 июнь. /“Дунё” АА/. АҚШ эронлик футболчиларнинг жаҳон чемпионатида иштирок этиш учун мамлакатга кириши мумкинлигини тасдиқлаб, барча ўйинчилар ва “зарур ходимлар”га виза берди, деб хабар қилмоқда “Дунё” АА мухбири “BBC”га таяниб.

Бироқ Эроннинг Туркиядаги элчихонаси АҚШнинг терма жамоа “менежерлари ва раҳбариятининг катта қисми” ҳамда “техник маслаҳатчилари”нинг мамлакатга киришини рад этганини айтиб, Вашингтонни “сиёсий сабаблар билан спортга аралашишга” уринаётганликда айблади.

Эрон оммавий ахборот воситаларининг хабар беришича, АҚШга кириш учун 15 кишига, жумладан, мамлакат футбол федерацияси раҳбари, унинг ўринбосари ва ОАВ билан ишлаш бўлими бошлиғига рад жавоби берилган. Эрон дипломатлари Халқаро футбол федерациясини (ФИФА) вазиятга аралашишга чақирган.

“Энди сиз Эрон футбол жамоасини қасддан камситишни энг юқори даражага олиб чиқдингиз”, – дейилади элчихона баёнотида. Бироқ АҚШ Эронга “баҳона билан мамлакатга террорчиларнинг кириб келиши учун тизимни суиистеъмол қилишга” йўл қўйилмаслигини таъкидламоқда.

Эрон футбол терма жамоаси Туркияда машғулот ўтказиб, 6 июнь куни Мексикага йўл олган. Турнир давомида уларнинг базаси шу ерда жойлашади. Улар 20 соатлик парвоздан сўнг бугун эрталаб манзилга етиб келиши кутилмоқда.

Эроннинг Мексикадаги элчисига кўра, виза шартларига биноан, Эрон терма жамоаси аъзолари ўзлари иштирок этадиган ўйинлар бўлиб ўтадиган куннинг ўзида АҚШга кириб, мамлакатни тарк этишлари керак бўлади. Дастлаб, Эрон терма жамоаси базаси АҚШнинг Аризона штатидаги Тусон шаҳрида жойлашиши керак эди.

Бироқ май ойи охирида уни Мексикага кўчиришга қарор қилинди. Шу тариқа, футбол бўйича жаҳон чемпионатига мезбон мамлакат тарихда илк бор ўзи амалда уруш ҳолатида бўлган давлат ўйинчиларини қабул қилади.

АҚШ Ички хавфсизлик вазирлиги “BBC”га эронликларга берилган визалар қандай чекловларни ўз ичига олишини айтмаган. Бироқ идора ЖЧ–2026 давомида “Америка халқи ва ташриф буюрувчилар хавфсизлигини таъминлаш ниятида қатъий” туришини билдирди.

Шу ҳафта АҚШ Давлат котиби ёрдамчиси Марко Рубио америкалик конгрессменларга Вашингтон Эрон делегациясида Ислом инқилоби посбонлари корпуси (ИИПК) билан алоқадор шахсларнинг бўлишига йўл қўймаслигини айтган. Таъкидланишича, бир неча эронлик футболчи ИИПК томонидан ташкил этилган мажбурий ҳарбий тайёргарликдан ўтган.

Эслатиб ўтамиз, 16 июнь куни Эрон терма жамоаси жаҳон чемпионатидаги илк ўйинини Янги Зеландия жамоасига қарши ўтказади. Учрашув Лос-Анжелесда бўлиб ўтади. 21 июнь куни ўша ерда эронлик футболчилар Бельгия билан, 27 июнь куни эса Сиэтлда Миср билан ўйнайди.